Ntơm bah rnôk ndâk njêng, Công ty TNHH Minudofarm Care bah wa Lê Đình Tư lĕ mĭn kloh trong hăn: mô tăch n’gluh ndơ rih ma rgum nkra njêng cà phê uĕh kah âk, cà phê kah n’hanh nkret njêng jru gay n’hao rnoh khlay grăp cà phê Việt Nam ta ntŭk tăch dak bah dih.

Aƀaơ Công ty mât rmôt kan 6-7 nuĭh dơi ntĭm nti uĕh nău way kan nkret njêng jru. Yơn, tĭng wa Tư, nău mĭn joi n’hanh mât jâng nuĭh pah kan aơ mô dơh, lơn lah tâm rnôk nău ŭch bah ntŭk tăch nar lơ hao, đă nuĭh pah kan an hăr blău pơk dŏng măy mŏk, ndoh ndơ mhe, tŏng nău uĕh di lam ntŭr neh. Wa Lê Đình Tư nkoch:

Khlay ngăn lah n’hao khlay bôk năp. Nău ton ndơ bah nuĭh ƀon lan ri mô jêr, nău ta aơ lah nuĭh kan nkret njêng jru he dôl dŭt mô tŏng. Bôk năp lor lah ăp băl an ŭch cà phê jêh nĕ he ntĭm nti tĭng gưl trong dŏng ăp công nghệ ƀư êng, ndoh ndơ mhe n’hanh geh nău kơl an. Năm khay dŭt lah jong nuĭh kan nkret njêng jru an dơi ntĭm nti âk lơn.

Wa Nguyễn Văn Hòa, ntoh măt Ntuk kan uĕh kah Cà phê Lam ntŭr neh ta Việt Nam mĭn lah, nkret njêng cà phê lah nău tâm rgop đah khoa học n’hanh kỹ thuật, đă nuĭh ƀư nău kan an dơi ntĭm nti uĕh, geh nău blău mĭn ƀư mhe n’hanh nuih n’hâm pah kan. Jêh rnôk play cà phê luh n’ging, trong nkret njêng lĕ ntơm đah tât râng bah kỹ sư nkret njêng, nuĭh wâr n’hanh nuĭh mpli. Trong nuĭh kan aơ ntrŭnh nău grăp cà phê geh ngăn ngên “dâk rêh” đah nău khlay mhe đŏng lah mô. Wa Nguyễn Văn Hòa an lah, gay tâm di nău moh “cà phê bah lam ntŭr neh”, Dak Lak an tâm di uĕh kah âk ngăn lah cà phê kah, dŭt êng đah nău way ơm rhiăng năm bah nău kan cà phê ta ntŭk:

Aơ lah nău đă dŭt khlay: nuĭh ngêt cà phê ŭch wât kloh tu tơm grăp, tâm rnôk nkret njêng, wâr, trong mpli... Nuĭh nghệ nhân wâr mô knŭng ƀư jêng kah ma hôm ndơ̆ nău nkoch, nuih n’hâm n’hanh nău uĕh văn hóa tă bah ăp ka chok cà phê.

Wa Lê Đức Huy, Kruanh Hội đồng thành viên Công ty TNHH MTV nglăp rwăt tăch n’gluh 2/9 Dak Lak an gĭt, ăp năm bah năp, Dak Lak lĕ geh âk nău rgâl tâm nkra njêng cà phê nâp nâl. Đah trong hăn mpeh uĕh nâp pah kan n’hanh ntuh kơl, Dak Lak lĕ geh âk ndơ cà phê geh tâm di lam ntŭr neh n’hanh dơi tăch n’gluh an Mỹ, châu Âu, Nhật Bản. Wa Lê Đức Huy an lah, jêh ăp trong hăn mpeh ndơ kro, cà phê Dak Lak lah êng, cà phê Việt Nam lah nsum, mbra rƀŏng tât trong hăn jêng ndơ, tât ty nuĭh ngêt cà phê:

N’ăp ta châu Âu dâl-ntŭk geh way wâr Arabica-aƀaơ khân pơng an nti tay trong wâr Robusta. Nău nĕ an saơ Việt Nam mô knŭng lah dak nkra njêng cà phê têh ngăn lam ntŭr neh, ma hôm dôl hăn lor tâm ntil nău cà phê kah Robusta. Việt Nam geh ndơ kro uĕh, kỹ thuật  wâr uĕh ri nuĭh rhŏ an nuĭh dŏng an gĭt wâr kah n’hanh dơi nkoch nău bah nuĭh ƀon lan tâm tĭng ka chok cà phê. Knŭng rnôk nĕ, khlay cà phê Việt Nam mư dơi hao n’hanh ntŭk tăch rwăt mư ngăn ngên hun hao nâp nâl.

Nghị quyết Đại hội Đảng bộ n’gor Dak lak năm kan 2025-2030 mĭn hun hao nuĭh kan, ngăn lah nuĭh kan uĕh blău âk, ngoăy tâm 3 nău rgâl hao lĕ pơk luh nău geh têh an hun hao cà phê uĕh kah n’hanh cà phê kơh êng. Nuĭh tĭng đah nău kan ndơ cà phê, wa Trịnh Đức Minh, Kruanh Hiệp hội Cà phê Buôn Ma Thuột an lah, nuĭh ƀon lan hôm ŭch gĭt tât ntĭm nti mpeh trong tăm gay săk geh âk, uĕh kah tĭng ăp nkuqal cà phê êng êng. Yơn khlay an rgâl ntĭm nti rmôt kỹ thuật, nuĭh way kan nkret njêng, mpli... Wa Trịnh Đức Minh dăn đă:

Ndâk ƀư kơp ndơ mât rbăy, clip, nău ntĭm di gay nuĭh nti dơi gĭt tât ta ăp ntŭk; nkre jêng rmôt nai ntĭm, nuĭh ntĭm blău an nău jêh tăm. Aơ lah rmôt ma Việt Nam dôl mô tŏng, yor prăk ntĭm nti dŭt âk. Ngih dak an ntop kơl khân pơng.

N’hêl na nê̆ an saơ, ăp năm bah năp, nău kan cà phê Dak Lak dôl ndăch, bah knơm tâm trôk nar kơl an lah dŭt âk, rgâl knơm tâm nuĭh kan hăr blău ty âk n’hanh công nghệ mhe. Nuĭh tăm, nuĭh nkret njêng, nuĭh wâr n’hanh nuĭh mpli dơi ntĭm nti da dê, geh nău gĭt blău n’hanh nău ntô̆ n’hao nău kan, du ka chok cà phê mô knŭng lah du ndoh ndơ, ma hôm trong ƀư Tây Nguyên. Nghị quyết Đại hội Đảng bộ n’gor Dak Lak mpeh ndâk njêng “Dak Lak jêng ntŭk tât bah cà phê lam ntŭr neh”, dôl tĭng gưl dơi ƀư rgâl, mô knŭng đah ndơ geh, ma đah uĕh kah, nău wât n’hanh kon nuĭh.