Ta xã Hòa Xuân, n’gor Dak Lak ƀư ntơm rdâk 3 ntŭk nchrăp kan têh lah: Nkual công nghiệp Hòa Tâm rơh bôk năp, ndrâm dak Bãi Gốc n’hanh Nkual công nghiệp công nghệ cao Phú Yên. Aơ lah ăp ndơ ƀư jêng suan ntrôl geh lĕ rngôch tơm prăk ntuh kơl hang rbăn rmen prăk, ton njêng đăt ndal công nghiệp n’hanh logistics an Tây Nguyên n’hanh Nam Trung Bộ.

Tâm nê trong nchrăp ntuh kơl rdâk njêng n’hanh tăch rgâl buăt nthoi ndơ dŏng Nkual công nghiệp Hòa Tâm – rơh bôk năp geh rnoh hvi dŏng neh nklăp  492 ha; lĕ rngôch tơm prăk ntuh kơl nklăp 4.200 rmen prăk. Trong nchrăp pă an ndơ dŏng ăp kôp an nău njêng Nkual liên hợp gang thép Hòa Phát geh rnoh dăng 6 rkeh tấn/năm, lĕ rngôch tơm prăk ntuh kơl nklăp 84.000 rmen prăk. Trong nchrăp ntuh kơl rdâk njêng ndrâm dak lêng Bãi Gốc geh lĕ rngôch tơm prăk ntuh kơl nklăp 16.300 rmen prăk. Bar trong nchrăp dja tă bah Tập đoàn Hòa Phát ntuh kơl. Nkre, Dak Lak ntơm rdâk njêng nkual công nghiệp Công nghệ cao ta phường Hòa Hiệp tă bah Tập đoàn N&G ntuh kơl hvi rlău 250 ha, lĕ rngôch tơm prăk ntuh kơl bơi 2.400 rmen prăk. Rnôk ăp trong nchrăp kan dja lăp dŏng mbra njêng suan rêng lam hun hao ăp n’gâng kan tăch rgâl, rhŏ dŏng bah n’gor Dak Lak; nta joi nău kan an rmưn nuĭh kan ta ntŭk./.