Wa Nguyễn Hải Triều, Groi Giám đốc N’gâng kan Công thương n’gor Dak Lak an gĭt, aƀaơ nău kan lĕ pă an lĕ ndoh ndơ dŏng jŭr bah dâng, nkre đă ăp ntŭk pă manh tay ntop rnoh ndơ mhe gay rhŏ an nău ŭch jêh dak bŭk. Wa Triều lah:

N’gâng kan Công thương lĕ geh samƀŭt njuăl ăp ntŭk kan pă manh ndoh ndơ nglăp sŏk tay ndơ gay rhŏ an kônh wa rwăt ndơ jêh rnôk phŭt sial dak bŭk rơh aơ. Nkre ntĭm rđău ăp rmôt geh tât kơt mât uănh ntŭk tăch gay gĭt nu nău n’hŭch nkrâm ndơ hao khlay ndal jêh yan mih dak bŭk.

Ndrel rnôk, nău kan dak si dôl mbơh ƀư rĭng âk trong mkra gay dêr geh ntoh nuh srê. N’gâng kan dak si Dak Lak lĕ n’gluh an 2.905 dŭng dak si rnăk wâl, 1.750 kg chloramin B, 30.000 grăp aquatab an ăp ntŭk. Ăp rmôt kơl ngăch dơi ƀư, tâm rgop ntop kơl mkra ntŭk ntô gŭ âm ta ăp ntŭk dak băm jru. Wa Phạm Minh Hữu, Groi Giám đốc N’gâng kan dak si an gĭt lĕ rngôch ntŭk but uănh săm ji lĕ plơ̆ tay pơk dŏng.

Aƀaơ lĕ rngôch ăp Ngih dak si gưl n’gor n’hanh ăp ngih dak si lĕ pơk dŏng nâm ơm. Nău kan dak si dôl tâm rgop đah ăp ngih dak si Trung ương gay ƀư but uănh săm ji. N’gâng kan dak si tâm ôp đah ăp Ngih dak si n’hanh Ngih dak si xă gay mbơh ăp ntŭk trạm, đă UBND ăp xă, phường geh ăp mpôl kan tât ri tâm rgop đah nău kan dak si gay ƀư kuăl jă nuĭh ƀon lan tât but uănh kop ji.

Nău kan ntĭm nti djôt dơn rnoh khuch khat dŭt têh, lơn lah ta gưl mầm non yor lĕ rngôch ndơ dŏng bán trú, nah phôi, nsưng lĕ djơh. Lĕ geh 1.195/1379 ngih samƀŭt hăn nti plơ̆ tay; hôm 184 ngih samƀŭt mô hŏ dơi pơk mpông, lĕ rngôch ta nkual mpeh bah lơ luh nar. Wa Lê Thị Thanh Xuân, Giám đốc N’gâng kan ntĭm nti n’gor Dak Lak an gĭt nău kan dôl dăn tơm prăk rlău 172 rmen gay nkra:

Ăp ngih samƀŭt mô hŏ dơi ntĭm nti an dơi an tât lĕ pơh aơ, yor kơt gưl mầm non aƀaơ ih bêl, nah phôi n’hanh ăp ndơ dŏng ri mih mô hŏ bah, jrô nti dŭt mpê̆, ntŭk ntô mô dơi đăp mpăn gay ăp mon plơ̆ tay jrô nti jêng mô dơi đăp mpăn. Dơi geh roh du pơh tay mư dơi jêh nkra.

Mpeh điện, công ty Điện lực Dak Lak lĕ rgŏ jă rmôt ntop kơl bah Quảng Bình, Quảng Trị, Huế, Đà Nẵng, Quảng Ngãi. Aƀaơ hôm 42.246 bu nuĭh dŏng, tâm ban rlău 13% ta nkual mpeh bah lơ luh nar dôl roh điện. Wa Trần Văn Thuận, Giám đốc Công ty Điện lực Dak Lak an gĭt:

Đah ăp ngih samƀŭt ri tĭng ntĭm rđău bah nău kan điện ri ăp ntŭk ngih samƀŭt kơl lor tâm nar nkra. Nău aơ nău kan điện mbra tâm rgop đah N’gâng kan ntĭm nti gay nkra lĕ.

Tâm ntil nău lŏ mir, nău kan dôl kơp tay khuch khat gay mbơh ƀư ntop kơl tĭng Nghị định 09, ndơn an pă ntil na nê̆ yor nău trôk nar n’hanh uĕh săk ntil mô đăp mpăn. Aƀaơ 40 xă, phường tâm nuĭh ntop kơl ndal dôl geh 120 cán bộ n’hao jŭr bah dâng gay kơp khuch khat, ngăch jŭr ntil yan puh. Wa Đặng Thị Thủy, Groi Giám đốc N’gâng kan tuch tăm n’hanh ntŭk ntô gŭ âm an gĭt:

Gâp lĕ nchrăp pah kan đah ăp ntŭk kan ntil mpeh ntil ba gay rhŏ an 171.000 ha ri tâm yan Puh aơ mbra đăp mpăn mpeh trong kan ntil. Ta năp măt ntop kơl ntil tơm đêt khay n’glêh nar, kuăih rwach ntŭk tât mbra ntop kơl ăp ntil biăp bum, play rpoăl gay joi nău rêh sa lor ƀât. Hôm đah nău kan ndrôk rpu ri an ndrung wang tŏng uĕh ri mpôl hên mư ntơm njêng tay mpôl.

Rơh mih dak lip têh lĕ n’glơi an rnoh khuch khat dŭt hô ƀư rlău 70 nuĭh khĭt n’hanh roh, rlău 150.000 rnăk jay geh dak băm jru, 120 jay khuch djơh lĕ rngôch; ndrôk rpu, tuh mbô, tui ka n’hanh ntung trong geh rlâm chrai. Dĭng lĕ khuch khat kơp nklăp 5.500 rmen prăk. Kruanh UBND n’gor DaK Lak Tạ Anh Tuấn đă ăp n’gâng kan, nău kan ngăch rjăp nkra, mô dơi an mbrơi rnôk nuĭh ƀon lan dôl dŭt ŭch ntop kơl ndal. Khlay ngăn lah tŏng dak si-ntŭk ntô gŭ âm, ơm rdâk nkra tuch tăm n’hanh đăp mpăn nău rêh an lĕ rngôch nkual geh khuch khat.

He nsrôih tay gay mbơh ƀư rdâk nkra jêh dak lip dŭt n’hâm khlay, lah ntoh nuh srê ri rdâk nsơm nkra njêng tăch rgâl dŭt jêr. Aƀaơ nău kan ndâk nkra dak lip lah khlay n’hanh jăch ndăn ngăn yơn an pă tâm ban gay đăp mpăn nău kan mô geh wăk kol ta mpeh bah lơ nhâp nar.