UBND n’gor Dak Lak mhe ƀư rơh rƀŭn kơp uănh mbơh ƀư ăp nău kan khoa học, công nghệ, rgâl mhe n’hanh rgâl mrô ta ntŭk, rgum dôh rklaih jêr jŏt gay đăp mpăn ngăch ăp nău kan n’gluh an. Lvang 2023-2026, n’gor mbơh ƀư 21 nău kan khoa học n’hanh công nghệ gưl n’gor đah dĭng lĕ prăk rlău 37 rmen, rgum tâm nău kan lŏ mir công nghệ mhe, nkret njêng, dak si n’hanh rgâl mrô. Bah năm 2021 tât aƀaơ, n’gor mbơh ƀư 9 nău nchrăp ƀư khlay mpeh công nghệ thông tin n’hanh ntŭk ntô mrô. Êng năm 2026, n’gor pă an 300 rmen prăk gay ƀư tĭng ăp nău nchrăp ƀư mhe kơt nkra ntŭk rƀŭn nchră trực tuyến tât gưl xă, rgâl samƀŭt mât prăp n’hanh ndâk njêng n’gâng tơm dữ liệu mrô rhŏ an trong kan ntĭm rđău, ƀĭt joet rnă njrăng đăp mpăn.

Wa Hồ Thị Nguyên Thảo, Groi Kruanh Rnâng kan UBND n’gor Dak Lak đă ăp n’gâng kan, nău kan, ƀon lan mĭn kloh nău kan, rgum dôh rklaih ntŭk kol, n’hao uĕh nuĭh kan n’hanh pơk hvi ăp ntrong ƀư săk rnglăy.

Tĭng nău kan, tĭng gưl an mĭn nău kan ƀư tĭng Nghị quyết 57 bah nău kan nơm n’hanh geh trong nchrăp na nê̆ ngăn tĭng nkô̆ nău 8 trong mĭn ƀư têh mpeh khoa học công nghệ, rgâl mhe ma n’gor ủy lĕ mbơh an, Ban ntĭm rđău lĕ mbơh an n’hanh an ăp trong ƀư nău kơl dăn đă Hội đồng jao an, kơl lor mpeh ndơ công nghệ thông tin, ndoh ndơ an ăp ntŭk kan. Uănh nđôi ăp pơh, ăp nău kan jao na nê̆ an dơi ngăch, trong nchrăp na nê̆ gay lôch jêh ăp rnoh an ƀư.

Geh tât nău kan rgâl mrô, N’gâng kan khoa học n’hanh Công nghệ Dak Lak mhe pah kan đah Ngih samƀŭt Đại học Tây Nguyên, tâm ban ŭch ntrôl dăng ntĭm nti thạc sĩ, tiến sĩ tâm ăp ntil nău công nghệ thông tin, dữ liệu n’hanh công nghệ sinh học; ndrel ntĭm nti đah rjăp, thực tập ta ăp ntŭk công nghệ bah n’gor. Tiến sĩ Đinh Hữu Hùng, Trưởng khoa Y Dược, Ngih samƀŭt Đại học Tây Nguyên an lah ăp đề tài mĭn njêng an tĭng nău geh êng ta ntŭk gay nsĭt tay âk săk rnglăy ngăn ngên an nuĭh ƀon lan.

Gâp mĭn lah ăp đề tài tât aơ tay, lah kơt N’gâng kan Khoa học Công nghệ nchăm tă bah ngih samƀŭt, an tĭng tâm ăp nău geh êng. n’hanh jêh rnôk nglăp nsum ri an tĭng tâm ăp nău geh êng ta mpeh bah lơ n’gor. N’hanh tâm nĕ geh ăp nkô̆ nău ma aƀaơ tâm Nghị quyết 72 mbơh tât mpeh nău nkra uĕh an hun hao đah ntil nău dak si. He tĭng tâm nĕ mbra nsĭt tay nău uĕh ngăn ngên an nuĭh ƀon lan.

Tĭng wa Phạm Gia Việt, Groi Giám đốc N’gâng kan Khoa học n’hanh Công nghệ Dak Lak, nău mbơh ƀư nghị quyết 57 mbra n’gluh an nău đă âk lơn mpeh ntĭm nti nuĭh kan rhŏ an rgâl mrô n’hanh hun hao wăng sa-rêh jêng.

Tâm Nghị quyết 57 ri rgâl mrô n’hanh ntĭm nti cán bộ mpeh rgâl mrô năm tât mbra ntrôl dăng nkô̆ nău aơ. N’hanh tâm trong săch ăp đề tài nău nchrăp ƀư gay rgop hun hao wăng sa rêh jêng, rgop ndŏ hao jêng geh nău rƀŏng 2 rnoh mrô bah n’gor Dak Lak.

Ndrel đah nĕ, Ban mât uănh Nkual Lŏ mir Công nghệ mhe TP.HCM tâm rgop đah N’gâng kan Khoa học n’hanh Công nghệ Dak Lak rgŏ jă Tâm rlong “Rdâk njêng nău kan rgâl mhe ƀư mhe tâm ntil nău lŏ mir kơt dŏng công nghệ mhe năm 2026” nkual Tây Nguyên đah bôk nău “Lŏ mir tâm pleh-Nkra njêng tay rgŏ năp kloh uĕh”. Rơh tâm rlong rƀŏng tât joi ăp ntrong ƀư kơt dŏng công nghệ mrô, rgâl luh êng n’hanh công nghệ sinh học gay n’hao khlay ndơ lŏ mir, hun hao lŏ mir nâp nâl. Giải nhất an êng du hê, doanh nghiệp geh dĭng lĕ 150 rkeh prăk; ăp nău nchrăp ƀư hôm e dơi geh dơn ntop kơl âk ngăn 400 rkeh prăk gay mât njêng n’hanh hun hao.

Wa Nguyễn Thanh Hiền, Groi Kruanh Ban Mât uănh Nkual lŏ mir Công nghệ mhe TP.HCM an gĭt rơh tâm rlong dơi an nthoi nuĭh kan đah TP.HCM n’hanh ăp n’gor Tây Nguyên, ntrôl hệ sinh thái rgâl mhe tâm lŏ mir.

Tâm lvang aƀaơ hin, đah Nghị quyết 57 ri he dơi geh dŭt dơh tâm nău ntrôl dăng kơt dŏng khoa học công nghệ, n’hanh tâm nĕ geh ăp ntil nău kơt mpeh rgâl luh êng tâm nkra njêng, kơt dŏng AI, jêh nĕ mã nkual tăm gay n’hao uĕh kah khlay ndơ lŏ mir. Yor nê mpôl hên tâm rgop đah N’gâng kan Khoa học n’hanh Công nghệ Dak Lak ƀư rgŏ jă tâm rlong nkual aơ gay joi ăp nău ƀư mhe gay bah nĕ ntop kơl tay ăp băl hun hao, n’hao nău nchrăp ƀư bah nơm, lơn lah kơt dŏng âk tâm nău ngăn gay ndâk njêng ăp doanh nghiệp dăng gay n’hao khlay ndơ lŏ mir n’hanh tăch n’gluh.

Đah nău ntrôl dăng khoa học công nghệ, rgâl mhe n’hanh rgâl mrô, Dak Lak ndrel ăp n’gor Tây Nguyên dôl tĭng gưl geh n’hâm soan mhe an hao jêng, rgop ƀư rgâl nău rƀŏng hun hao ngăch, nâp nâl tâm rach năm hao săk nơm bah neh dak.