Ôi ơm ta ƀon Tơ Drăh, xă Bờ Ngoong, n’gor Gia Lai, wa Rôr, nuĭh Ba Na, uănh mpeh tâm mir cà phê hôm nkŭm tŭk. Đêt nuĭh gĭt, bơi du năm bah năp, wa tă geh kuăl jă tĭng kuăl lah “Bana Đêga Kon Kông”-rmôt yor ăp nuĭh dun n’gang rdâk ta nâm nău n’gang chroh rƀŭn gay tâm nkhah tâm rnglăp rnoi nuĭh. Wa Rôr nkoch, yor nău wât đêt, lŏ ƀa ƀơ geh nuĭh m’hĭk mâp, nkoch trêng nkoch nău tih jêng wa jŏ djăt tĭng. Jêh âk rơh dơi cán bộ công an, mặt trận, nsum mpôl tât jay rgŏ jă, rblang, wa mbrơi gĭt wât nău ngăn bah ăp nuĭh rmôt chroh rƀŭn gay phah neh dak. Aƀaơ wa đăp mpăn ƀư sa, hun hao wăng sa rnăk wâl, njrăng mô djăt ăp nău rlăm bah nuĭh m’hĭk.

Bah kơi nău rgâl nĕ lah nău njrăng n’gang êng yơn nâp nâl bah lĕ trong chính trị bah dâng. Nĕ mô knŭng lah njrăng n’gang đah trong way kan, ma bôk năp lah sŏk tay nău nsing nơm tâm nuih n’hâm ƀon lan.

Ta âk ƀon lan nkual jru bah Gia Lai, rup ndah cán bộ mặt trận, công an xă, rmôt ƀon lan kan lŏ mir, mpôl druh ndăm... ăp nar tĭng ƀon lĕ jêng bên, Khân pơng gŭ ndrel, sa ndrel đah kônh wa; djăt nău nkoch, dôh rklaih jêr jŏt, nsrôih nkoch trêng gay nuĭh ƀon lan wât kloh nău rlăm, trong ƀư bah ăp nuĭh dun rlơn. Mô klach gung trong ngai, âk cán bộ bah dâng hăn tât tĭng jay ƀon lan, ndăn tĭng nar rgum rƀŭn nsum mpôl, tĭng rơh rƀŭn thôn gay nkoch trêng. Geh nuĭh an rgŏ jă ăp khay, đê̆ đŏng âk năm mhe rgâl nău wât. Yơn nău ngăn ngên, dăch êp lĕ kơl kônh wa wât kloh, cán bộ tât mô di gay n’gluh an mô lah rmal, ma an mât đăp mpăn ƀon lan.

Tâm rơh njrăng n’gang nĕ, ăp bu ranh ƀon, nuĭh dơi nsing nơm dơi uănh kơt n’ha nking n’gang bah ƀon lan. Bu ranh ƀon H’Mrik, nuĭh nsing nơm ta xă Biển Hồ, dơi kônh wa ntĭt kơt tâm jri têh nking n’gang ƀon lan luh ăp trong “sial khih” bah “Tin lành Đêga” n’hanh ăp ntil nău chroh mhe yor ăp nuĭh rlăng ndâk njêng.

Âk rơh, ăp nuĭh m’hĭk joi trong mâp, yơn đah nău tă rlău n’hanh nuih n’hâm njrăng n’gang wa H’Mrik mô knŭng nsrôih jăng lơi ma hôm nsrôih rgŏ jă kônh wa mô djăt, mô tĭng nău nuĭh m’hĭk.

Gâp râng nău kan bu ranh vƀon 23 năm aơ hôm. Gâp mô gĭt âk yơn nsrôih, nsrôih dŭt n’hâm nơm pah kan, ndrel Đảng kơl ƀon lan, hăn lor ăp nău kan, gay leo nuĭh ƀon lan tĭng trong bah Đảng, Chính phủ; gay geh nău rêh hơm răm uĕh lăng. Lĕ rngôch nuĭh ƀon lan tâm ƀon geh kho ao uĕh, geh ngih wâl uĕh n’hanh geh ndeh ncho. Tât aƀaơ, kônh wa tâm ƀon knŭng djăt Đảng, ngih dak, mô djăt tĭng bu, ăp nuĭh nsŭk rlăm, mpôl hên mô tĭng ôh. Aƀaơ, mpôl hên knŭng mĭn pah kan, nkra njêng tuch tăm lŏ mir gay hun hao wăng sa rnăk wâl-ƀon lan.

Mô knŭng lah ntŭk nsing nuih n’hâm, ăp bu ranh ƀon kơt H’Mrik hôm mât uĕh tâm rnglăp tâm ntŭk gŭ rêh. Rnôk geh rnăk wâl jêr jŏt kônh wa kơl; rnôk geh nău tâm rkeh, bu ranh dâk rsaih nkra; bônh đă druh ndăm mĭn ƀư sa, tĭng nău ntrŭnh bah Đảng, pháp luật bah ngih dak. Rlău ăp nuĭh, ăp nuĭh nsing nơm wât kloh, ŭch kônh wa mô djăt tĭng nuĭh m’hĭk lor bôk năp ƀon lan an đăp mpăn, nău rêh hơm răm.

Bah nău wât nĕ, ăp nău kơl n’hŭch ach o, ndâk njêng n’gâng kan ƀon lan ăp gưl ta Gia Lai mbơh ƀư dŭt n’hâm tât ƀon lan. Rnôk nău rêh đăp mpăn, kônh wa lơ nsing knơm tâm Đảng, Ngih dak ri nău nsŭk rlăm, ntrŭt ntrôl bah nuĭh m’hĭk mbrơi mô hôm neh rêh, n’ăp tâm ăp nuĭh tă hăn tih trong.

Tĭng wa Ra Lan Chung, Kruanh HĐND n’gor Gia Lai, n’gor dôl mbơh ƀư âk nău kơl uĕh gay rgop nuih n’hâm, kơl ăp nuĭh tă hăn tih trong jŭt jăng nău đit prêng, nglăp nsum ƀon lan, đăp mpăn nău rêh:

Năm mhe rlău lĕ rgŏ jă geh soan dăng bah lĕ trong chính trị ndrel râng mkra ăp nău kan jêr bah ăp nuĭh lĕ tĭng Fulro rnôk plơ̆ sĭt đah nsum mpôl, bônh leng, ntĭm nti, kuăl jă khân pơng. Ta n’gor dôl ƀư tĭng ntrong kan “Plơ̆ sĭt nău nsing nơm-mât đăp mpăn ƀon lan” dơi uănh lah dŭt prêh đah săk rnglăy, nău ngăn ngên.

Ndrel đah hun hao wăng sa, Dak Lak uănh khlay ntuh kơl ntĭm ti, n’hao gĭt blău gay nâp nâl “jâng nsan nuih n’hâm ƀon lan” ta nkual jru ngai, ngăn lah nkual n’har bri.

Mpeh bah kơi ăp nău rgâl đăp mpăn ta ăp ƀon lan hôm geh nău kơl êng bah rmôt công an, tahen, dôl tĭng nar mâp njrăng nău rêh đăp mpăn an nuĭh ƀon lan. Ăp rmôt nkre ƀư ndrel nuĭh ƀon lan hun hao wăng sa-rêh jêng, nkre nchrăp gĭt nu nău ta ntŭk, njrăng n’gang đah ăp nuĭh dun n’gang, ăp ntŭk chroh mhe. Rnôk dơi geh nuih n’hâm ƀon lan, ăp chuyên án njrăng n’gang ăp rmôt dun n’gang, nău ƀư mplư rlăm chroh gay dun phah dơi geh nău kơl âk bah ƀon lan. Tĭng Đại tá Phạm Hữu Trường, Groi Giám đốc Công an n’gor Gia Lai, âk nuĭh tă kuăl jă tĭng nău chroh rlăm, jêh rnôk wât kloh nău ngăn tih bah rmôt, lĕ plơ̆ sĭt đah ƀon lan, jêng nuĭh uĕh.

Lơn lah, jêh njrăng n’gang lĕ dơi rgum du đêt nuĭh n’gâng tơm jêng rmôt dŭt n’hâm ntrong leo lam ƀon lan mât rnă njrăng neh dak, rgŏ jă âk nuĭh tih trong plơ̆ sĭt tay gŭ âm chroh rƀŭn ngăn, rgop mât đăp mpăn rnă njrăng ta ntŭk.

Rnôk ăp nuĭh rlăng hôm e joi trong phah, gay mât nâp đăp mpăn an ƀon lan an geh ndrel soan du nuih n’hâm njrăng ăp lĕ trong chính trị, bah bu ranh ƀon, nuĭh nsing nơm n’hanh bah ăp nuĭh ƀon lan. Du rơh njrăng n’gang mô nteh phao yơn dŭt n’hâm; sŏk nău ngăn gay rgum, sŏk hun hao wăng sa gay nâp nâl nsing nơm, sŏk nău tâm rnglăp gay ntrôl rŭch nău ƀư tâm nkhah. N’hanh n’hêl na nê̆ lĕ an saơ, rnôk ƀon lan saơ kloh muh măt bah nuĭh m’hĭk, rnôk Đảng, n’gâng kan ƀon lan n’hanh rmôt kan dơi kan geh nuih n’hâm ƀon lan, ri ăp nău mplư rlăm dun n’gang, ăp nău chroh rklă dun n’gang bôl mhe ntŭk tât mbra rlơt n’glưh tât nĕ. Yor đăp mpăn bah ƀon lan dơi mât nâp lor lah bah nău njrăng  n’gang tâm nuih n’hâm ƀon lan./.