Tổng Bí thư, Kruanh dak Tô Lâm rhơn rnê ăp tập đoàn têh bah Thái Lan pơk hvi ntuh kơl, tăch rgâl ta Việt Nam, lơn lah tâm trong kan tâm di đah nău ŭch geh hun hao bah Việt Nam n’hanh geh nău dơi njêng rnoh khlay tâm boh bar ding.

Tổng Bí thư, Kruanh dak lah rjăp, Việt Nam uănh khlay tâm boh têh jong lam lĕ rngôch đah Thái Lan, tâm nê tâm boh wăng sa, tăch rgâl, ntuh kơl n’hanh buăt nthoi doanh nghiệp lah n’gâng tơm khlay rgop ntrŭt ntrôl hun hao jŏ jong n’hanh n’hao dăng buăt nthoi bar jâng wăng sa. Nchih nkah rnôk ntuh kơl, tăch rgâl bah Tập đoàn TCC ta Việt Nam tâm ăp năm aơ, Tổng Bí thư, Kruanh dak ntrŭt nsôr Tập đoàn ntuh kơl tay, hun hao nău kan tăch rgâl ta Việt Nam tĭng trong rƀŏng n’hao nău dơi mât bôk kan, ntrŭt ntrôl dŏng khoa học n’hanh công nghệ, rgâl blău ƀư mhe, mât njrăng ntŭk gŭ rêh n’hanh rgop uĕh an nsum mpôl ta ntŭk.

Tâm rnôk hăn khâl Thái Lan, bah năp nê, Tổng Bí thư, Kruanh dak Tô Lâm hŏ tât mpoh nhang ta Nkual têl ơm yău Kruanh Hồ Chí Minh n’hanh mâp ƀon lan nuĭh Thái tơm Việt dôl gŭ rêh ta nkual Đông Bắc Thái Lan.