Trong kan đăp mpăn rnă njrăng, đăp mpăn an rơh săch đại biểu Quốc hội khóa 16 n’hanh đại biểu HĐND ăp gưl năm kan 2026-2031 ta Dak Lak dôl dơi ƀư rĭng, dŭt n’hâm. Gay ăp nuĭh ƀon lan dơi nklăch phiếu da dê n’hanh di nău ntrŭnh, Công an n’gor Dak Lak mĭn kơp uănh, nchih săk nuĭh ƀon lan lah nău dŭt khlay.

Ntŭk kan lĕ nchrăp tâm rgop rjăp đah Ủy ban săch ăp gưl tâm nău mbơh ƀư, tâm nsrâng n’hanh joi uănh samƀŭt nchih săk ƀon lan. Dơi an khlay tâm nău rgâl mrô nchih săk, rĭng tâm ban nu nău ntơm tă bah ntŭk dữ liệu ngih dak mpeh ƀon lan, tă bah nĕ n’hŭch đêt ngăn tih, tâm trŭp mô lah vĭ nuĭh ƀon lan. Nău dŏng dữ liệu mrô mô knŭng n’hao nău di na nê̆, kloh rah wah tâm nchih săk nuĭh ƀon lan ma hôm dơh tâm in ấn, pă thẻ nuĭh ƀon lan, đăp mpăn ăp nuĭh ƀon lan tŏng dơi ƀư tĭng nău dơi săch.

Công an n’gor lĕ ntĭm rđău công an ăp xă, phường mât uănh, nchrăp ƀư tŏng ăp rnôk pă an thẻ ƀon lan gay ƀon lan râng nklăch phiếu; nkre tâm rgop đah Ủy ban săch ƀư di ăp nău ntĭm bah Cục Mât uănh hành chính mpeh đăp mpăn rêh jêng. Tât rnôk aơ, Ủy ban săch ăp xă, phường lĕ dơi rgâl mrô ntŭk ƀon lan gŭ n’hanh in thẻ nuĭh ƀon lan di gưl, sam ƀŭt n’hanh nar đă”.

Công an n’gor Dak Lak lĕ ƀư hăn kan, ndâk njêng 10 rmôt pah kan đah rlău 300 cán bộ, tahen na nê̆ jŭr 102 xă, phường gay gĭt nu nău, ngăch mkra ăp nău ntoh mhe, ngăn lah ta ăp ntŭk têh.