Wăng sa rêh jêng n’gor Đắk Lắk mbơh tay nău uĕh. N’gor Đắk Lắk dôl rgum mkra ăp wăk kol tâm nău ƀư bah n’gâng kan ƀon lan 2 gưl, n’hao săk rnglăy ntĭm rđău ƀĭt joet, tĭng nău rƀŏng hao jêng 8% năm 2025. Ủy ban nhân dân n’gor Đắk Lắk an gĭt, bah meng nĕ hao jêng uĕh bah công nghiệp, ndâk ƀư ntung trong, lŏ mir, si bri, tui ka n’hanh tăch n’gluh, ri nău kan mât rong bah n’gor joi tay nău ŭch hao jêh nuh srê dơi uănh nđôi uĕh. Lơn lah, bôk nău kan jut ngih rông mpông sat an nuĭh ach o dơi mbơh ƀư dŭt n’hâm.

Tât aƀaơ, 100% jay ntop kơl lĕ ƀư, rlău 6.900 jay lĕ jêh jao an, geh bơi 78% ngăch ƀư, nsrôih jêh lĕ rngôch bah năp lơ 15/8. Tĭng wa Tạ Anh Tuấn, Kruanh UBND n’gor Đắk Lắk, bôl ndrĭ, gay geh nău rƀŏng hao jêng dĭng lĕ ndơ ta lam n’gor lĕ năm 8%, hao jêng 8,64% tâm 6 khay dŭt năm, hôm e nău kan dŭt n’hâm jêr jŏt. Gay dơi geh nău rƀŏng aơ, lor lah an dôh rklaih ăp wăk kol tâm nău ƀư bah n’gâng kan ƀon lan 2 gưl; mkra jêr jŏt, mbrơi ngăch ta ăp nău nchrăp ƀư khlay, n’hanh n’hao pă an prăk ntuh kơl nsum.