Ta ngih măy nkret njêng cà phê bah Công ty cổ phần Đầu tư n’hanh Phát triển An Thái, ăp trong nkra njêng cà phê môi n’hanh cà phê mpli pah kan na nao gay ngăch jao ndơ an nuĭh dak bah dih. Wa Nguyễn Xuân Lợi, Tổng Giám đốc công ty an gĭt, ăp ndơ nchăm bôk năm lĕ dơi jêh, ndoh ndơ lĕ dơi rdêng jŭr ndrâm dak, pơk trong dơh an nău rƀŏng hao jêng năm 2026.

Doanh nghiệp nchrăp lor mĭn joi, gĭt nu nău n’hanh dŏng săk rnglăy ăp trong ƀư, nău kơl bah Ngih dak an pah kan nkra njêng tăch rgâl. Aơ lah nău ntrŭt khlay gay mpôl hên pơk hvi tay ntŭk tăch, n’hao dơi tâm rlong n’hanh hun hao nâp nâl tâm khay tât.

Năm 2025, geh prăk tăch n’gluh bah Dak lak geh nklăp 2,8 rmen đôlar, hao bơi 40% nkôp đah năm bah năp, tâm nĕ lŏ mir mât tay tơm khlay đah ăp ndơ kơt cà phê, sầu riêng, ca cao, mắc ca... Săk rnglăy aơ geh tay nuih n’hâm an doanh nghiệp nsing nơm lăp tâm năm nkra njêng mhe. Wa Nguyễn Tiến Dũng, Groi Tổng Giám đốc Công ty TNHH MTV Xuất nhập khẩu 2/9 Dak Lak (Simexco Daklak) an gĭt, lah doanh nghiệp ngih dak hăn lor tâm tăch n’gluh ndơ lŏ mir lăp tâm năm 2026, doanh nghiệp n’hao tay kan ndrel đah ăp rmôt kan dak bah dih gay hun hao cà phê kah, pơk hvi ntŭk tăch n’hanh n’hao khlay cà phê ta ntŭk.

Mpôl hên geh du trong ƀư na nê̆, nĕ lah nchrŏng trong hun hao rnoh ndơ, n’hao uĕh kah an nuĭh ƀon lan kơt trong tâm rgop bah mpôl hên gay jêng du trong cà phê kah bah Việt Nam mbra hăn lam ntŭr neh.

Ndrel đah ăp doanh nghiệp cà phê, âk hợp tác xã play dô djôt dơn nău mbơh uĕh. Ta Hợp tác xã Xanh Cao Nguyên, xă Cư M’gar, n’gor Dak Lak, chanh rse rih dôl tâm yan tăch n’gluh an ntŭk tăch rwăt Trung Quốc, Hoa Kỳ n’hanh Canada... Wa Nguyễn Văn Thanh Bình, Giám đốc Hợp tác xã an gĭt, ndrel đah tăch n’gluh chanh rse play rih, hợp tác xã dôl ntuh kơl ngih măy nkret njêng gay hun hao ăp ndơ nkret njêng jru.

Bah meng tăch n’gluh play rih, hợp tác xã dôl ntuh kơl ndâk ƀư ngih măy gay nkret njêng ăp ndơ nđik, pâr kro n’hanh păt dak chanh rse rhŏ an tăch n’gluh. Hợp tác xã nchrŏng trong hun hao ăp ntil ndơ nkret njêng jru bah chanh sre kơt ndơ kŏt n’hanh dak gay n’hao khlay ndơ lŏ mir. Gay đăp mpăn ndơ nkra njêng đăp mpăn, hợp tác xã dôl n’hao tâm rgop đah ăp nuĭh n’hanh pơk hvi nkual tăm chanh rse tĭng trong nkra njêng rgum, rhŏ an nău ƀư nkret njêng n’hanh tăch n’gluh jŏ jong.

Ndrel hăn jru mpeh khlay, rnoh ndơ n’hanh uĕh kah ndơ tăch n’gluh, ăp doanh nghiệp lŏ mir ta Dak Lak jêng du njuăt hăn nkra njêng jru. Tĭng wa Hoàng Danh Hữu, kruanh Hội đồng thanh viên, Công ty trách nhiệm hữu hạn thương mại dịch vụ Ê Đê, nkret njêng jru kơl ăp doanh nghiệp âk ntil ndơ, mĭn joi geh ntŭk tăch mhe, hun hao dơi moh êng. Ăp doanh nghiệp mpŏng ŭch dơi gĭt âk lơn đah ăp nuĭh tă bah ăp nău ƀư ntrŭt ngăch tăch rgâl. Wa Hoàng Danh Hữu nkoch:

Mpôl hên dŭt mpŏng Bộ Công thương ntrôl dăng ăp nău ƀư ntrŭt ngăch tăch rgâl ăp ding đah ăp dak ma aƀaơ he dôl geh tâm boh kan ndrel têh n’hanh kan ndrel têh lĕ rngôch, gay ntrôl ndơ dŏng tâm nĕ cà phê bah Việt Nam lăp ăp ntŭk tăch aƀaơ ndơn ma nĕ knŭng tâm nchră đah ăp hiệp định tăch rgâl dah rŏng nsum ri he ntơm ƀư ăp ding âk lơn gay geh âk nău kơl.

Năm 2026, Dak Lak n’gluh an nău rƀŏng geh prăk tăch n’gluh geh rlău 2,9 rmen đôlar, rgum pơk hvi ntŭk tăch n’hanh n’hao khlay ndơ lŏ mir tă bah nkret njêng jru. Đah nuih n’hâm nkra njêng n’gŭr răm ntơm bah bôk năm, nsum mpôl doanh nghiệp lŏ mir ta ntŭk dôl saơ na nê̆ dŭt n’hâm n’hao uĕh kah, ndâk njêng moh êng ndơ n’hanh ndơ̆ ndơ lŏ mir Dak Lak hăn ngai lơn ta ntŭk tăch lam ntŭr neh. Nău aơ rgop n’hao geh prăk an nuĭh ƀon lan, doanh nghiệp n’hanh ntrôl hun hao wăng sa-rêh jêng bah n’gor, rƀŏng tât geh ngăch hao jêng wăng sa 2 rnoh mro tâm lvang tât./.