Ôi (27/11), ta Hà Nội, râng Đại hội đại biểu lam dak Mpôl Doanh nhân mom Việt Nam tâl VIII, năm kan 2025-2030, Thủ tướng Phạm Minh Chính dăn đă Doanh nhân mom Việt Nam ntik n’hao dăng suan mom, lĕ nău gĭt blău, nuih n’hâm rŏng dak, nău way ơm rnoi nuĭh tĭng ƀư 6 "dâk leo lor" n’hanh rgŏ jă trong leo tâm rlong "6 dâk bôk năp". Bah năp mông ntơm pơk, Thủ tướng Chính phủ n’hanh lam Đại hội rong du mnĭt nhêp măt nkah gĭt ƀon lan khĭt tă bah trôk nar lơh; Mpôl doanh nhân mom Việt Nam rong 6 rmen prăk ntop kơl ngăch 6 n’gor Cao Bằng, Hà Tĩnh, Đà Nẵng, Khánh Hoà, Gia Lai, Dak Lak nkra bah khuch khat dak bŭk.

Mpôl Doanh nhân mom Việt Nam geh nklăp 21.000 hội viên ăp doanh nghiệp hŏ njêng geh nău kan an 5 rkeh nuĭh kan, lĕ rngôch nsĭt geh ăp năm rlău 40 rmen USD n’hanh rgop rlău 10% GDP neh dak. Hang rhiăng rmen prăk dơi an ƀư ăp bôk nău kan ăp tŏng geh nău rêh hŏ dơi rgâl kloh nuih n’hâm dâk leo lor yor nău dơn kan an nsum mpôl bah rmôt doanh nhân mom... Mbah rhơn ăp nău dơi dŭt di ma n’hao êng săk bah rmôt Doanh nhân mom, lah rjăp nău nsrôih, têh jêng n’hanh kuâng dăng bah rmôt Doanh nhân mom Việt Nam, Thủ tướng dăn đă Mpôl Doanh nhân mom Việt Nam lor nchrăp tay, blău ƀư mhe, pêt mât, nkrêp kan nsum n’hanh ntop kơl mpôl doanh nhân mom ntik n’hao dăng suan mom, lĕ nău gĭt blău, nuih n’hâm rŏng dak, nău way ơm rnoi nuĭh, dâk leo lor tâm rnôk ntơm njêng nău kan, rgâl blău ƀư mhe, rgâl mbrô, rgâl nđĭr uĕh, dŏng trí tuệ nhân tạo tâm nău kan tuch tăm ƀư njêng, tăch rgâl; ndơ̆ ăp rnoh khlay săk ntơ lư Việt, ndơ geh ƀư Việt luh lam ntŭr neh; nkre dâk leo lor tâm dơn kan an rêh jêng kon nuĭh. Nkhêp geh rnôk dja, Thủ tướng dăn đă Mpôl Doanh nhân mom Việt Nam ntik n’hao trong leo ƀư tâm rlong “6 dâk bôk năp” lah: "dŭt dâk leo lor, dŭt blău ƀư mhe, dŭt n’glăp săk, dŭt tâm rnglăp, dŭt lăp rgum, dŭt rŏng nuĭh"./.