Nar nđaơ (1/3), druh ndăm Mât njrăng n’har bri n’gor Dak Lak du rơh ƀư ăp nău kan rgŏ jă “Khay druh ndăm”, “Khay 3 n’har bri” hăn ndrel đah n’hao nkoch trêng mpeh săch đại biểu Quốc hội khóa 16 n’hanh HĐND ăp gưl năm kan 2026-2031 ta nkual n’har bri. Druh ndăm ta 13 pôih Tahen n’har bri n’hanh ăp ntŭk kan Tiểu đoàn Tiăr nti-Cơ động, Hải đội Biên phòng mpeh tâm Ban ntĭm rđău Tahen n’har bri n’gor Dak Lak lĕ ƀư ăp nău kan đăp mpăn rêh jêng kơt chop khâl, an ndơ ăp rnăk geh nău rêh jêr jŏt, rnăk dơi kơl; an prăk kơl hăn nti an kon hŏk ach o rlet rlău jêr jŏt; nkra, ƀư uĕh ăp ndơ dŏng, ntŭk tât khlay ta nkual n’har bri n’hanh neh kơh. Nău uĕh bôk năp bah druh ndăm N’har bri Dak Lak rơh aơ nău ƀư nkoch trêng, mbơh rblang pháp luật mpeh ƀư tơm dak lêng, gôl dak, rnă njrăng n’har bri, nkre tâm rgop nkoch trêng mpeh săch đại biểu Quốc hội khóa 16 n’hanh HĐND ăp gưl năm kan 2026-2031, rgum tâm nău dơi, nău kan nuĭh ƀon lan râng săch. Tă bah nĕ, n’hao wât chính trị, wât lĕ đah nău kan an đoàn viên, druh ndăm, nuĭh ƀon lan lah nuĭh nkual n’har bri ƀư tĭng nău dơi n’hanh nău kan nuĭh ƀon lan, rgop ndâk njêng neh dak pháp quyền.

Ta xă Ô Loan, Pôih tahen n’har bri An Hải tâm rgop đah Mpôl druh ndăm xă lĕ an 20 nklâm ndơ an kon hŏk jêr jŏt, hao tâm nti nsơm; sa nkra ndơ ƀư druh ndăm “Ánh sáng tri ân” gay mbơh nuih n’hâm nkah gĭt jru đah ăp rơh hăn lor lĕ geh soan têh kuăng tâm nău ndâk kan njrăng n’gang Neh dak. Thượng úy Đỗ Ngọc Hoàng Sang, Đội phó rmôt rgŏ jă ƀon lan, Pôih tahen n’har bri An Hải, Ban ntĭm rđău Pôih tahen n’har bri n’gor Dak Lak an gĭt, ăp nău ƀư tâm khay 3 mô knŭng mât ƀư tơm hăn lor, kơl kan bah druh ndăm mât uănh đăp mpăn nău rêh jêng, ma hôm rgop khlay tâm trong kan nkoch trêng chính trị, ndâk njêng nuih n’hâm nâp nâl ta nkual n’har bri.

Tă bah ăp nău ƀư “Khay druh ndăm”, “Khay 3 N’har bri”, mpôl hên mô knŭng rgum tâm trong kan đăp mpăn rêh jêng, ma hôm ntrôl dăng nkoch trêng, mbơh rblang pháp luật, lơn lah nkoch trêng mpeh nău dơi n’hanh nău kan nuĭh ƀon lan săch đại biểu Quốc hội khóa 16 n’hanh HĐND ăp gưl năm kan 2026-2031. Tă bah nĕ kơl đoàn viên, druh ndăm n’hanh nuĭh ƀon lan nkual n’har bri dak lêng n’hao wât chính trị, ƀư tĭng di nău dơi ƀư tơm bah nơm, rgop an rơh săch ƀư ƀon lan ƀư tơm, di luật, đăp mpăn n’hanh lôch uĕh.