Ta rgum nchră, ăp đại biểu mbơh ngăn, yor âk nkô̆ nău, nău mô di bu ur bu klô hôm e tâm ntŭk gŭ rêh, jêng nău rgâl nău mĭn du ding bu ur bu klô n’hanh rpăi trong ơm. Yor nê, đah nău gĭt n’hanh nău ngăn dơi djăt, druh ndăm lah nsum, druh ndăm rnoi mpôl đêt lah êng an lah rmôt hăn lor tâm nău nkoch trêng, rgâl nău wât bah ăp nuĭh kiău ma mpeh nău tâm ban bu ur bu klô. Sinh viên Triệu Thị Nhung, rnoi nuĭh Dao, Ngih sam ƀŭt Đại học sư phạm-Đại học Đà Năng, nkoch:

Ta ntŭk bah oh hôm e nău kơt bu ur rnôk jêh nti jrô 9 mô lah jrô 12 an gŭ ta wâl pah kan mô lah hăn sŏk sai. Yor nuĭh têh way mĭn bu ur bôl nti âk ri ôi taơ klak hăn sŏk sai ri mô dơi geh nău kơl an rnăk wâl. Jêng me bơ̆ đă kon nơm an sŏk sai ơm n’hanh rlu nti. Oh mĭn ta ntŭk gâp druh ndăm an nsrôih nkoch ntĭm ăp nău mĭn bah gâp gay rgâl ăp nău mĭn ơm rluk mâl.

Ăp đại biểu an lah, an rgâl nău mĭn tâm ban bu ur bu klô n’hanh rpăi trong ơm bu ur bu klô joi nău tâm rgop bah âk nkô̆ nău, bah ntĭm nti, nău kơl tât văn hóa nău rêh jêng. Tâm nĕ an n’hao ntĭm nti mpeh tâm ban bu ur bu klô ta ngih sam ƀŭt, tâm rgop ăp bôk nău ntĭm nti kơt nsŭt nsôr sinh viên râng ăp rmôt nsum mpôl, ăp nău ƀư rêh jêng. Bah nĕ n’hao nău wât gay mkra ăp nău êng nơm kơt nkoch trêng tâm ntŭk gŭ rêh. Wa Hoàng Thị Hạnh, tă ƀư Groi kruanh n’gâng kan, groi chủ nhiệm Ủy ban Dân tộc an lah, druh ndăm rnoi mpôl đêt wât mpeh rnoi nuĭh, nău way văn hóa bah rnoi nuĭh bah nơm. Khân pơng geh trong mkra tâm di an ntơm ntrôl rŭch, jŭt jăng nău mĭn tâm ban bu ur bu klô, rpăi trong ơm du ding bu ur bu klô.

Nău ƀư tơm khlay rnôk ma druh ndăm dâk ƀư ăp nău kan gay nkoch trêng đah nău mprơ, nău hôr; đah ăp nău ƀư uĕh bah rgum rƀŭn ăp câu lạc bộ, rmôt kan ăp nău ƀư tâm nđŭr đah nsum mpôl bah rnoi nuĭh aơ đah rnoi nuĭh êng tâm ăp rnoi mpôl đêt; Nti ăp nău uĕh, tâm nĕ nău mĭn tâm ban bu ur bu klô n’hanh rpăi trong ơm lĕ dơi jăng lơi mô lah ntơm ntrôl rŭch.

Ntoh ngơi ntơm ƀư rgum nchră, Groi Kruanh Trung ương Hội LHPN Việt Nam Nguyễn Thị Thu Hiền nkoch: Rgum nchră lah di an lĕ rngôch đại biểu, ăp oh sinh viên, druh ndăm dơi tâm nchră, tâm nkoch, nkre djăt, djôt dơn ăp nău mbơh khlay, nkô̆ nău an rhŏ nău kan, an nău hun hao bah săk nơm n’hanh mpŏng ŭch rgop an nsum mpôl bah ăp nuĭh. Đah Trung ương Hội LHPN Việt Nam n’hanh ăp nău kan geh tât, aơ lah di an uănh kloh lơn tay nău bư bah druh ndăm, sinh viên râng ntrôl tâm ban bu ur bu klô nkual rnoi mpôl đêt n’hanh nkual yôk, gay geh ăp trong ƀư, nău kơl mât uĕh nău rgop khlay bah rmôt aơ. Tĭng wa Nguyễn Thị Thu Hiền, nău jŭt jăng nău tĭng nău mĭn du dĭng, rpăi trong ơm an geh nău ntop kơl, nta an, bah âk nău kan geh tât, ntrôl n’hanh ntrŭt kơl an druh ndăm ƀư tĭng nău mpŏng ŭch nơm.

Dŭt mpŏng ŭch N’gâng kan ntĭm nti mbra ntrôl dăng ăp nău ƀư nkoch mbơh, n’hao nău wât, ƀư ân nău kan bah dih gay mbơh an nău wât, nău blău đah tâm ban bu ur bu klô an sinh viên, gay rmôt aơ mbra ngăn ngên lah rmôt hăn lor, hăn bôk năp tâm nău jŭt jăng nău mĭn du ding bu ur bu klô, rpăi trong ơm, ntrôl tâm ban bu ur bu klô.

Rgum nchră geh tâm trôm nău ƀư bah trong nkoch trêng rgŏ jă ntrôl tâm ban bu ur bu klô đah bôk nău “Druh ndăm rnoi mpôl đêt hăn lor rgâl nău mĭn êng du ding bu ur bu klô yor mpŏng ŭch hun hao”. Trong nău ƀư dơi ƀư geh tâm trôm nău nchrăp ƀư 8 “Ƀư tĭng tâm ban bu ur bu klô n’hanh mkra ăp nău khlay đah bu ur n’hanh kon se” mpeh tâm bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk lvang 2021-2030. Ăp oh sinh viên râng nău ƀư aơ lah ăp nuĭh hăn lor rgâl nău mĭn du ding bu ur bu klô, rpăi trong ơm tâm rnăk wâl n’hanh nsum mpôl, jŭt jăng ăp nău way ơm mô tâm di, lah mpêr n’gar nking n’gang an nău hun hao bah săk nơm n’hanh nsum mpôl. Ăp oh mbra du hê nuĭh nkoch trêng dŭt n’hâm, geh nău mĭn mhe, trong ƀư uĕh, mĭn ƀư mhe nkoch trêng n’hao nău wât đah bu ur bu klô, tâm ban tât băl bên, nuĭh tâm rnăk wâl n’hanh rơh kơn bah kơi... rgop ntrôl lơn tay nău tâm ban bu ur bu klô ta nkual rnoi mpôl đêt n’hanh nkual yôk.