Ăp nar mih têh ntoch jong, ta yôk Một, phường Quy Nhơn, n'gor Gia Lai, lŏ ƀa ƀơ mĭn rvê nau rluh neh. Ta yôk prêh, âk ngih jay gŭ nchah nchrai. Ba dâng jâng yôk, du đê̆ ngih geh pĭch rlâm du đê̆, âk rnăk ntrơn du ntŭk êng.

Wa Phạm Thị Thùy, Kruanh tổ dân phố 19, phường Quy Nhơn an gĭt, dŭt âk ngih gŭ tâm nkual aơ yor nuĭh ƀon lan pơk hvi, ndâk ƀư êng jêh nĕ rvăt ngih tăch, ntrơn jêng âk tơ̆. Năm 2025, rnôk nu nău pĭch rlâm trôk nar lơn khuch hô, hŏ geh 9 rnăk ntrơn hăn, aƀaơ hôm 27 rnăk gŭ rêh ta aơ. Nău mô tŏng săm ƀŭt pháp lý ƀư trong nchrăp ntop kơl, pă ntŭk gŭ an nuĭh ƀon lan mâp jêr jŏt:

"Nau ntrŭnh bah n'gor mpeh nau ntrơn ƀon lan ri âk ngăn ăp rnăk kơl an. Yơn geh du đêt rnăk ƀon lan mô ŭch yor bu sŏk neh n'hanh đă kơl an neh. Tâm rnôk n'gor knŭng kơl du gưl, yor ƀon lan mô geh săm ƀŭt kơp dơn nau dơi dŏng neh ri tĭng nau ntrŭnh knŭng kơl an du gưl prăk gay ma ndâk mô lah gŭ tâm ăp ntŭk đăp mpăn lơn, mô geh gŭ ta ăp ntŭk khuch djơh rluh rlâm."

 Nkual ƀon lan gŭ yôk Một jêng lĕ rlău 20 năm. Ta năp nău mbra rluh neh nar lơ âk, lơn ma jêr jŏt, ta ntŭk dôl ndăn ngăch kan nsum đah N’gâng kan ndâk nkra, N’gâng kan Tuch tăm ndrel Ntŭk ntu n’gor Gia Lai uănh n’ôi, dăn đă trong nchrăp ntrơn du ăp rnăk ƀon lan tâm nkuăl n'har bri, nkre mĭn ƀư nau rgâl mhe, nkra ueh ntŭk ntu. Wa Nguyễn Đức Toàn, Kruanh UBND phường Quy Nhơn, mbơh:

 "Aƀaơ n'gor dôl rđău đă ndăn jao ăp n'gâng kan n'hanh UBND phường Quy Nhơn uănh n’ôi, tâm ôp tâm nchră trong mkra gay ƀư tĭng nău kan ntrơn du ăp rnăk ƀon lan. tâm nkual aơ. Rnôk mih phŭt tât phường lĕ nchrăp trong ntrơn du lĕ rngôch ăp rnăk ƀon lan gŭ tâm nkual geh ma nău pĭch rlâm mbra geh tât ntŭk đăp mpăn".

 Nkô̆ nău ntrơn du ƀon lan bah nkual pĭch rlâm yôk Một mô dơn lah nău đă ndal gay mât njrăng nău rêh, drăp ndơ, ma an geh trong ntop kơl n'hanh dăp rgum ntŭk gŭ mhe tâm di, mât đăp mpăn nău rêh jŏ jong an nuĭh ƀon lan. Gay nău ŭch gŭ âm jêng ngăn ngăn, n'gâng kan ƀon lan n'hanh ăp n'gâng kan an ngăch dôh rklaih jêr jŏt, ntrôl ngăch ăp trong nchrăp ntrơn du, ntŭk gŭ mhe, kơl ƀon lan đăp mpăn nău rêh./.