Lơ 14/10, ta Dak Lak, N’gâng kan Tuch tăm ndrel Ntŭk ntu ƀư nar rƀŭn nchră tâm nau kan tuch tăm, njrăng rdâng trôk nar lơh ndrel ntrŭnh ƀư nau nchrăp nau kan tâm năm 2027 nkuăl Duyên hải Nam Trung Bộ ndrel Tây Nguyên. Năm 2026, nau kan tuch tăm nkuăl Tây Nguyên ndrel Duyên hải Nam Trung Bộ lŏ geh hun hao đăp mpăn. Rnoh neh tăm ba nklăp 182 rbăn ha, nau dăng bơi tât 65 tạ/ha, rnoh geh rlau 5 rkeh tấn. Tơm sa play geh rlau 3 rkeh tấn. Đah ăp tơm tăm jŏ năm, cà phê lŏ mât nau dơi tơm tâm ăp ndơ tuch tăm tăch luh dak ba dih, nsĭt geh rlau 65 rmen đôla. Lam nkuăl geh rlau 2000 mrô nkuăl tăm, đah rnoh 57 rbăn ha ndrel rlau 600 ntŭk tâl dŭng. Yơn lah, nau kan tuch tăm bah nkuăl Duyên hải Nam Trung Bộ ndrel Tây Nguyên hôm mâp âk nau jêr yor rnoh máy móc leo dŏng kan hôm đê̆, nau dŏng ntil tăm ê geh tŏng ma nau đă, bu tuh tâm tơm tăm ndrel ăp nau geh kơp dơn ân nâp kloh jêr geh bah ntŭk leo tăch dak ba dih.

Bah năp nau tât El Nino lơh jêng duh phang, mih nar mô ueh, ăp nkuăl nchrăp doh rklaih nau jêr mpeh trong hoch dak, mât ndơ tuch tăm ndrel ƀư nau kan tuch tăm ân tâm di. Tâm rơh rƀŭn, N’gâng kan tuch tăm ndrel tnŭk ntu lah rjăp nau đă n’hao nâp tay nau dơi geh mpeh ndơ tuch tăm, ƀư nau kan tuch tăm tâm di nau đă ndrel n’hao lơn tay nau tâm rgop bah ƀon lan kan lŏ mir, ntŭk tâm boh nau kan đah ntŭk kan tăch rgâl. Bah năp nau tât bah El Nino lơh jêng prăng bri, ăp nkuăl ân geh nchrăp ndâk nau kan rdâng, uănh kloh tơm dak ndrel trong hoch tâm di, ntrơn rgâl yan tuch tăm, tơm tăm ân tâm di, mô ân geh nchrăp ndrât ndal rnôk geh prăng bri./.