Ntơm bah nar 2 tât 4/10, n’gor Gia Lai ƀư đại hội đại biểu Đảng bộ n’gor lor bôk năp năm kan 2025-2030. Lôch n’glăp nsum đah Bình Định, n’gor Gia Lai mhe jêng dơn ngoăy “rsang rnglay bah bri neh têh hvi, dak lêng nđĭr uĕh rgum nsum”. Aơ lah ntŭk nsing gay n’gor n’gluh rnoh tât rdâk njêng pâl nđaih jêng ăp n’gâng tơm hun hao tâm rơh mhe n’hanh ndơ̆ rnoh tât kan dja tâm siƀŭt mbơh chính trị hao rblang dăn đại hội Đảng bộ n’gor lor bôk năp.

Lôch n’glăp nsum, Gia Lai hŏ njêng têl nkah ma Lễ hội “Rsang rnglay bri neh têh hvi – Dak lêng rgum uĕh”. Ntơm bah ăp rlong trong jê̆ bah ƀon lan, chĭng gong chuat luh tât dak lêng têh hvi, ndăch rvăch rlai lăp nsum võ way ơm; Djăt gŭch, mƀêt prung bah yôk bri ntoh ndrel ka ngừ đại dương. Nău mpơl gĭt lor bah Gia Lai ta nar ƀư dja lah n’gor mbra buăt nthoi văn hóa 2 nkual Đông-Tây, lăp nsum săk tơm nkre đah hun hao pâl nđaih bri dak, văn hóa, lịch sử n’hanh dak lêng nđĭr uĕh. Nuĭh blău chĭng gong mom Rcom Bus, ta Pleiku, nkoch nău rhơn rnôk lor bôk năp nchreng an uănh chĭng gong bah meng kơh dak lêng Qui Nhơn.

“Saơ lễ hội dŭt âk ntil n’hanh uĕh mƀak rnôk tâm râp nsum tâm lễ hội khuh n’gôr yor mpôl hên ta mpeh Gia Lai nkual yôk prêh, ta aơ lah Gia Lai nkual dak lêng rlai lăp ri gâp saơ nău mpât mprơ lơn ma rah rơch n’hanh săk ntơr lơn”

Bah năp ntŭk hun hao pâl nđaih pơk hvi, ăp doanh nghiệp hăn leo trong pâl jong nar ta Gia Lai hŏ ngăch lăp kan đŏng. Wa Hoàng Thị Thu Sen, Giám đốc Vietravel gŭ kan ta Bình Định an gĭt, công ty mô dơn pơk tay văn phòng ta Pleiku, ma hôm njêng ƀư âk ndơ pâl nđaih “hao bri- jŭr dak lêng”. Tĭng păng, tâm du njăr trong dơm, năch pâl nđaih mbra rlong năl gĭt n’hâm sial tâm lĭn lơ Đông – Tây Trường Sơn, uănh joi gĭt drăp ndơ ơm yău ntlơi an tay văn hóa, lịch sử Tây Nguyên, rlu rlău ta kơh dak lêng jong rlău 130 km mpeh bah luh nar n’gor.

“Ta mpeh nhâp nar n’gor Gia Lai mpôl hên mbra njêng ăp ndơ geh ƀư mhe leo năch hăn tât ta aơ, đah dak lêng n’hanh bri ri mpôl hên mbra ƀư ăp ntŭk pâl nkêng mpeh văn hóa – lịch sử, hăn jru tâm rkŭm tour dja. Ăp ntŭk tât ta Gia Lai ân ntuh kơl đŏng. Tâm ntŭk hăn uănh pâl kơt Chư Đang Ya, trong nê mbra hăn ndeh 45 ntŭk gŭ yơn mhe hăn dơi du mbor dơm, si gle 2 ding ân muĭh aih, nta trong dơh an ăp nuĭh leo năch hăn uănh pâl jong nar. Hăn uănh năl rơh dja mpôl hên mbra n’glăp way tâng jru lơn mpeh ndơ văn hóa lịch sử”

Đah doanh nghiệp pâl nđaih, nău n’glăp dơn ngoăy Gia Lai-Bình Định dơi uănh lah jâng ntơm gay plơ̆ tâm n’guăk nău mĭn hun hao. Wa Nguyễn Tấn Thành – Kruanh Hiệp hội Pâl nđaih Gia Lai (ơm) – năl, aơ mô dơn lah dăp rgum tay n’har neh, ma khlay lơn lah pơk luh trong hun hao soih uĕh jŏ jong pâl nđaih tâm ntêng lêng nkual, tâm rep, nter lĕ ndơ mpêt khlay. Nău mha êng n’hâm sial n’hanh khay klêh donh đah dak lêng n’hanh bri kơl ntŭk hăn pâl nđaih dơi pơk wăr năm.

“Yor ntŭk hăn pâl dơi pơk hvi wăr năm. Rnôk jêng 1 n’gor ri pâl nđaih ăp khay đêt nuĭh hăn bah bình định ơm ri lah rnôk âk nuĭh hăn uănh pâl ta Gia Lai ơm n’hanh rlơ̆ tay jêng wơt năch wăr năm. Hăn 1 njăr trong yơn geh 2 trong rêh, yor kơt nê̆ mbra geh âk ntil trong pâl nđaih mhe dơi pơk luh, nkre ntŭk pâl nđaih âk ntil lơn, kơl năch dah rŏng sơch ntŭk hăn pâl”.

Tâm ban kơt doanh nghiệp đŏng, nuĭh ƀon lan ta ăp thôn buôn n’gor Gia Lai, ntơm bah trong leo ƀư pâl nđaih tuch tăm- nsum mpôl đêt, n’gluh nău mpŏng buăt nthoi dak lêng, ndơ̆ ndơ kah khlay êng bah he rhŏ dŏng năch. Yuh H’Uyên Niê ta ƀon  pâl nđaih nsum mpôl Ia M’Nông, xã Ia Ly an lah, lah n’gâng kan tâm dâng hăn ndrel ngăn n’hanh kônh wa, kơl nuĭh ƀon lan ƀư pâl nđaih nar lơn ma way blău lơn ri mô jêr gay ƀon lan tât dơi đah năch pâl nđaih dak bah dih.

“Gay ăp dăp lơn, săk nơm nha hôm dơi kơi năp nti đŏng gay rnôk năch dak bah dih tât, nuĭh ƀon lan nơm ta ntŭk mpli ăp ntil dak ngêt tâm di đah nuĭh dak bah dih, lơn lah ăp ndơ sa gay tâm di đah năch Trung quốc, năch châu Âu”

Tĭng siƀŭt nchrăp mbơh Chính trị hao rblang dăn đại hội Đảng bộ n’gor năm kan 2025 -2030,  pâl nđaih lah ngoăy tâm prăm n’gâng tơm wăng sa bah n’gor. Nău ŭch tât na nê̆ lah tât năm 2030 mbra wơt geh 18,5 rkeh tơ̆ năch/ năm, tâm nê rlău 1 rkeh tơ̆ năch dak bah dih. Gay dơi tât rnoh dja, N’gâng kan văn hóa Thể thao n’hanh pâl nđaih n’gluh 4 trong nkra glo tơm. Wa Đỗ Thị Diệu Hạnh, Gíam đốc Sở Văn hóa Thể thao n’hanh pâl nđaih n’gor Gia Lai, an gĭt:

“Rgum mât ndray, ntik n’hao ăp rnoh khlay văn hóa, bri dak uĕh măt uănh lịch sử. Rgum rdâk njêng nkơnh n’hơ săk ntơ lư bah pâl nđaih, rgum buăt nthoi Đông – Tây, hun hao pâl nđaih dak lêng, pâl nđaih nsum mpôl, pâl nđaih rlong uănh saơ. Rgum ntuh kơl tơm ndơ mha êng lah ntrôl dăng ngăch ăp trong nchrăp kan aƀaơ dôl an ƀư ta n’gor gay mhâm ƀư wăch rgum năch pâl nđaih ndơ̆ luh ntơm bah aơ tât kêng dŭt năm kan. Kêng dŭt lah njêng tơm ndơ hun hao pâl nđaih, njêng luh ăp ntŭk pâl nđaih uĕh êng tâm let năp tay”

He mbra dơi saơ, lôch n’glăp nsum mô hŏ năn jŏ, Gia Lai hŏ geh ăp njuat hăn lĕ n’hâm suan: ntơm bah leo ƀư nău kan văn hóa, ntrŭt ntrôl doanh nghiệp ôp uănh, nuĭh ƀon lan ntơm leo n’hanh tĭng kơn n’hao trong ntĭt leo nsum mpôl, an tât dăp rgum trong nchrăp têh jong n’hanh n’gluh tât jŏ jong. Bah năp mper Đại hội Đảng bộ n’gor, Gia Lai hŏ nchrăp an njuat hăn mhe, ndơ̆ pâl nđaih jêng suan ntrôl hun hao, rgop rdâk njêng n’gor jêng ntŭk rgum tơm bah lam nkual Tây Nguyên n’hanh duyên hải miền Trung.