Na nê̆ lơ 30/9, wa Đinh Văn Thanh ta nkuăl ƀon têh Đăk Pơ rnôk geh kuaih neh an lâng gay ma ƀư jay rĭ geh saơ âk nting nuĭh, n’hanh du đê̆ ndơ dŏng kơt lah bi đông, dŭng tâl ndơ, mâng nchih máy, ntô jot cao su n’hanh âk găr ndrak. Wa Thanh lĕ mbơh nău aơ đah ntŭk kan têh.  Dơn nău mbơh, Đội K52 n’gor Gia Lai lĕ rgum lĕ cán bộ, tahen ndrel đah ndeh klư máy mok tât joi n’hanh rgum ntĭng ta nkual aơ. Bâh nău rgum joi, Đọi K52 uănh năl rnoh nting klâp ma 32 nuĭh, geh tâp nsum n’hanh tâm ntŭn. Aƀaơ mpôl kan tahen n’gor Gia Lai lĕ geh rgum joi tay, tâm ăp nuĭh tă kan kăl e tât râng tâm lơh ta Đăk Pơ gay ma rgum mbơh tơih. Nkre lah Đội K52  mbra pơk hvi tay ntŭk joi n’hanh uănh mbơh rblang na nê̆ gay ma gĭt năl ntơ săk ăp kôp nting.