Ôi 21/7, Mpôl groi nđôi bôk nău bah Ủy ban Thường vụ Quốc hội pah kan đah n’gor Gia Lai mpeh nău ƀư tĭng nău kơl, pháp luật mpeh hun hao ŭnh nar lvang 2016-2021. Nău mbơh njuăl tât Mpôl groi nđôi nkoch kloh: Aƀaơ, Gia Lai dơi dăp rgum 88 nău nchrăp ƀư ŭnh nar nkra njêng đah dĭng lĕ dăng rlău 4 rkeh 347 rbăn MW geh: 60 nău nchrăp ƀư thủy điện, 9 nău nchrăp ƀư điện măt nar, 17 nău nchrăp ƀư điện sial, rlău ma nĕ geh rlău 3.200 trong điện măt nar ntưm chor.

N’gor dăn đă đah Thủ tướng Chính phủ, N’gâng kan Công Thương n’hanh ăp n’gâng kan nău kan geh tât uănh mĭn tay, ndơ̆ tâm dăp rgum hun hao điện lam dak lvang 2021-2030 đah 135 ăp nău nchrăp ƀư ŭnh nar nkra njêng đah trong điện truyền tải geh nău dơi, đah dĭng lĕ dăng nklăp 15.566 MW gay rgŏ jă ăp tơm prăk gay hun hao uĕh nâp âk lơn. N’gor Gia Lai dăn đă Quốc hội ntĭm rđău ndâk njêng n’hanh an Luật mpeh ŭnh nar nkra njêng; dăn đă Chính phủ ndrel ăp n’gâng kan, nău kan ơm an nău ntrŭnh mpeh mât uănh, ƀư tĭng ăp nău nchrăp ƀư điện jăch ndăn tâm dăp rgum hun hao điện lực gay ƀư nkô̆ nău ƀư tĭng, rgop đăp mpăn rnă njrăng chính trị, đăp mpăn nău rêh jêng ta ntŭk.