Kêng măng 7/11, Thủ tướng Phạm Minh Chính râng rƀŭn nchră Gưl prêh Kan ndrel Campuchia-Lào-Myanmar-Việt Nam rơh tal 11, ƀư ta nkual ƀon têh Côn Minh, n’gor Vân Nam (Trung Quốc). Đah bôk nău “Ntrŭt ntrôl nău dăch dêh n’hanh tâm rnglăp yor nsum mpôl hao êng n’hanh uĕh lăng”, Rƀŭn nchră lĕ n’gluh an ăp nău rƀŏng têh gay mât uĕh nău geh bah ăp nuĭh, ndăn dơi geh bah ăp trong hun hao mhe, jêng ntŭk tât ntuh kơl uĕh bôk năp nkual, n’hanh hao kan ndrel đah ăp dak Campuchia-Lào-Myanmar-Việt Nam.

Ntoh ngơi ta rƀŭn nchră, Thủ tướng Phạm Minh Chính năl lah lam ntŭr neh dôl uănh nău rgâl jru, pơk luh an 4 dak dơi hun hao mô hŏ tă geh, dơi geh bah rach năm tâm rgop n’hanh rgâl mhe. Aơ lah rnôk khlay an rgâl mhe kan ndrel đah ăp dak tâm nkual. Thủ tướng Chính phủ mĭn lah Việt Nam uănh khlay kan ndrel Campuchia-Lào-Myanmar-Việt Nam n’hanh mbra rgop dŭt n’hâm gay ƀư jru lơn tay tâm boh dăch dêh way ơm, oh nô dăch dêh, ndrel geh, ndrel hao tâm rach năm hun hao mhe.