Ta ăp ntŭk tăch rgâl ndơ rdâk njêng ngih jay ta ăp xã Phù Cát, ăp nar lôch tă phŭt sial mbrô 13, geh dŭt âk lơn năch tât đah ăp nar êng, ngăn lah năch hăn rvăt ngoí n’hanh tôl ntưm. Wa Nguyễn Văn Cát ta thôn Phú Kim, xã Phù Cát mhe geh rvăt rlău rhiăng mblâm ngói ntưm. Wa Cát an lah, nău khlăy ngăn rnôk aơ lah drăp ndơ geh ƀư an tâm di  an ƀon lan gay ma ơm nkra tay ngih jay rnôk nchrăp tay ta rơh mih sial.

“Gâp saơ rnoh khlăy mô geh hao đah ntơm nơh, nău khlăy ngăn lah ntŭk tăch ndơ khân păng  ơm geh ndơ, ƀon lan ŭch rvăt lah gay dâl gay ma ntưm ngih jay mô geh kâp jŏ”.

Ta ăp ntŭk tăch ndơ, rnoh khlăy ndơ geh nchih pla ta năp, kơl an ƀon lan dơh uănh n’hanh dơh rvăt. Âk rnăk tăch rgâl an  gĭt ta rơh lôch phŭt sial lah rnôk tâm kơl nău jêr jŏt đah ƀon lan, mô dơi n’hao khlăy rnoh tăch. Yuh Nguyễn Thị Thu Thuỷ, tơm ntŭk tăch ndơ Sơn Quân, thôn Phú Kim ngơi.

 “Rnoh lĕ geh mât đăp mpăn bâh kăl e, geh rnôk lah ƀư ngih jay bar pe rbăn mblâm gach ngói rĭ rnoh khlay kơt nĕ đŏng ma aƀaơ bu tât rvăt bar pe mblâm tăch rnoh nĕ đŏng, geh rnôk lah ƀon lan rvăt đê̆ ir gâp an dơm dâl”.

Wa Nguyễn Ngọc Minh, nuĭh tơm ntŭk tăch ndơ Hồng, phường Quy Nhơn Nam an gĭt, tâm rnôk mạng xã hội ntoh geh âk nău mbơh an lah ngói n’hanh ndơ ntưm mô âk, rnoh khlăy rlău bar, pe rnoh rĭ nău geh ta Gia Lai an saơ lah rlơ̆ tay. ăp ntŭk kan tăch rgâl ta ntŭk hôm nha geh rnoh ndơ nkrem dŭt âk bâh ntơm ta năp phŭt.

“Hôm nha geh mât rnoh khlay kơt ơm mô geh hao khlăy, tôl đah xà gồ, 2 ntil ndơ nĕ lah saơ rgâl khlay âk, hôm ndơ ơm rĭ gâp tăch kơt rnoh khlăy ơm mô geh hao rnoh khlăy”.

Gay ma der nău nkrâm ndơ mô tăch kâp n’hao rnoh khlăy, mpôl kan mât uănh tăch rgâl n’gor Gia Lai lĕ geh uănh nđôi n’hanh an bơi tât 400 rnăk tăch rgâl ndơ ƀư ngih jay ton mât đăp mpăn rnoh khlăy, mô geh nde ma phŭt sial gay ma n’hao rnoh khlăy, nkre lah n’hao nău uănh nđôi ăp n’gâng kan gay ma mât đăp mpăn ueh drăp ndơ geh tăch tâm di. Nô Lê Đình Tân, nuĭh kan mât njrăng ntŭk tăch rgâl mbrô 4, ntŭk kan mât uănh ntŭk tăch rgâl n’gor Gia Lai mbơh.

“Ăp công ty ton đah mpôl kan têh lah mbra geh tăch đah rnoh mât đăp mpăn an ƀon lan, mpôl kan têh đah mât uănh ăp ntŭk tăch rgâl đah công an ta ntŭk tâm rgop ntĭm leo rnăk tăch rgâl kơl an ƀon lan, tăch rvăt mhâm ƀư an tâm di gay ma rlet rlău rơh geh nău tât bâh mih sial”.

Đah nău kan doanh nghiệp, rnăk tăch rgâl ta n’gor Gia Lai leo kan mât rnoh khlăy đăp mpăn, ndrel đah nău lăp kan ngăch ndăn bâh mpôl kan têh, lĕ geh tâm rgop ntop kơl an ƀon lan ơm nkra ngih jay, đăp mpăn nău rêh jêng lôch tă phŭt sial mbrô 13.