Kêng măng 5/3, ta Hà Nội, N’gâng kan tâm rnglăp nchră nău tâm rgop đah UBND n’gor Gia Lai ƀư rƀŭn mbơh lam ntŭr neh an mbơh nu nău mpeh Năm Pâl nđaih lam dak-Gia Lai 2026. Đah bôk nău “Gia Lai-Đại ngàn chạm biển xanh”, Năm Pâl nđaih lam dak 2026 geh nău mbơh mpeh boăt nthoi đah ntŭk ntu bri têh Tây Nguyên đah nkual dak lêng duyên hải, đah bri dak têh n’hanh nău uĕh văn hóa bah ăp rnoi nuĭh.

Aơ lah rơh an Gia Lai nkoch mbơh đah lam ntŭr neh ăp nău khlay văn hóa bri dak n’hanh kon nuĭh bah nkual neh Tây Nguyên. Tâm năm 2026 nchrăp mbra geh 244 nău ƀư, nău ƀư văn hóa, pâl nđaih n’hanh thể thao ƀư na nao ta Gia Lai n’hanh âk ntŭk ta lam dak. Nău khlay lah ntơm ƀư Năm pâl nđaih lam dak-Gia Lai 2026, nchrăp ƀư ta măng lơ 28/3 ta phường Quy Nhơn. Tâm pơh ntơm ƀư, n’gor Gia Lai mbra ƀư rƀŭn nchră ntrŭt ngăch ntuh kơl năm 2026, nchrăp an nău ntrŭnh ntuh kơl n’hanh ký ton kan ndrel an âk nău nchrăp ƀư mpeh ăp ntil nău công nghiệp, ŭnh nar, ntung trong, tăch rgâl-nău rhŏ n’hanh pâl nđaih. Bah meng nĕ, âk nău ƀư ngăn an năch pâl nđaih mbra dơi ƀư kơt: Bôk nău kan mpla nsơ cà phê hăn ndrel đah pâl nđaih lŏ mir; nkoch nău uĕh ndơ sông sa ta ntŭk; ăp giải thể thao ndrel âk nău ƀư văn hóa uĕh.