Mô dơn lah trong tơm me gưl neh dak, trong cao tốc Quy Nhơn – Pleiku hôm geh nkô̆ khlay mha êng tâm nău buăt nthoi nkual n’hanh ntrŭt ntrôl hun hao wăng sa- rêh jêng kon nuĭh ta n’gor Gia Lai. Gay đăp mpăn rnoh ngăch ƀư ntơm bah kêng dŭt năm aơ, ăp n’gâng kan n’hanh ăp ntŭk tâm n’gor dôl ndăn ngăch nchrăp ăp ndơ khlay. Tâm nê, pah kan trok tâm, đă ntrơn du dơi năl lah rêng kan tơm khlay.

Ntơm bah bôk khay 7/2025, UBND xã Ia Băng, n’gor Gia Lai hŏ lor nchrăp ƀư ăp rơh hop ƀon lan, mbơh gĭt trong nchrăp ntuh kơl, djăt nău mpŏng bah nuĭh ƀon lan. Lôch nê, njêng hội đồng trok tâm, nkre kan nsum lhăt đah Ban mât uănh trong nchrăp ntuh kơl rdâk njêng n’gor n’hanh đơn vị mbơh nti kỹ thuật gay nchrăp ntăm n’gâng n’har njăr trong tâm khay 8/2025. Wa Nguyễn Trường Sinh Kruanh UBND xã an gĭt, đah nău dơn kan mhe, xã râng jru tâm  pah kan trok tâm, đă ntrơn du, kơl nău kan dơi nkra ngăch lơn:

“Trong nchrăp bah UBND n’gor tĭng ƀư kơt nê, tĭng mpôl hên lah dŭt tâm di. Đah ăp njăr trong hăn rlău, mpôl hên mbra nchrăp dơi tâm nău tâm ôp đah nuĭh ƀon lan, dơh ngăch lơn. Tâm nê, UBND n’gor dŭt uănh khlay, rđău đă ăp mpôl tơm mât uănh trong nchrăp n’hanh nuĭh tơm mbơh nti nsrôih kan nsum đah xã gay mpôl hên an ƀư mhâm an nău đă ntrơn du, trok tâm ƀư dŭt ngăch, dŭt tâm di n’hanh njêng geh nău tâm ban ŭch âk tâm ƀon lan dŭt âk.”

Hôm ta xã Mang Yang, ntŭk geh 10,3km trong cao tốc Quy Nhơn – Pleiku nchrăp mbra hăn rlău, geh 400 rnăk ƀon lan geh săk ân đă ntrơn du, tâm nê geh nklăp 22 rnăk ƀon lan ân đă ntrơn du tât ntŭk gŭ mhe. Wa Võ Lê Xuân Thiện – Kruanh UBND xã Mang Yang an gĭt, xã hŏ ơm njêng hội đồng trok tâm n’hanh mpôl mât uănh trong nchrăp gưl xã, kan nsum ôp uănh, kơp nđăp tât njêng trong nchrăp đă ntrơn du.

“Lôch rnôk ƀư trok tâm, đă ntrơn du tong neh, đah 22 rnăk ntrơn du tât ntŭk gŭ mhe, mpôl hên hŏ ơm geh neh gay tâm pă tĭng di quy định. Neh dăch ntŭk ƀư trong cao tốc, jêng mbra dơh tâm rnôk an tĭng ƀư.”

Nchrăp ƀư trong cao tốc Quy Nhơn – Pleiku lah njăr trong tơm khlay gưl neh dak, geh lĕ rngôch rnoh jong nklăp 125km rlău n’gor Gia Lai. Nchrăp geh lĕ rngôch rnoh prăk ntuh kơl rlău 43.700 rmen prăk, nchrăp ntơm pah ƀư tâm kêng dŭt năm 2025 n’hanh wat jêh năm 2029. Njăr trong hăn rlău 17 xã, phường bah n’gor Gia Lai, khuch tât rlău 3.000 rnăk ƀon lan lam njăr trong. Tâm nê, geh rhiăng rnăk ân dơi ntrơn du tât ntŭk gŭ mhe.

Wa Nguyễn Tự Công Hoàng – Groi Kruanh UBND n’gor Gia Lai lah rjăp, trok tâm đă ntrơn du lah nău kan krit jêr, ân ƀư ăp tŏng rêng, grêt dăch ngăn ngăn. N’gor hŏ nchrăp tơm prăk ngân sách gay ƀư, nkre rđău đă dŏng trong tĭng mha êng, sŏk mplơ̆ na nê̆ tơm neh lŭ n’hanh ntŭk bun jăng ndŏk nja, rgop nkra ngăch, grêt dăch n’hanh  tâm di đah nô nău ngăn ngăn tĭng ntŭk. Bah  nê, nău trok tâm, ntop kơl, đă ntrơn du ntŭk gŭ mhe dơi an ƀư tĭng trong ngăch ngăr, grêt dăch tĭng nău ŭch n’hanh mpŏng geh tâm di bah nuĭh ƀon lan.

“N’gâng kan ta ntŭk ân hăn ôp uănh na nê̆, ntrŏng kloh: dah âk rnăk ân đă ntrơn du ntŭk gŭ mhe, dah âk môch ân ntrơn tâp, ntŭk ntrơn ta ah ntŭk, nău ŭch bah nuĭh ƀon lan lah moh ndơ, tâm di ta ah ntŭk ri tâm pă ntŭk ntrơn du ta ntŭk nê, ân ntoh bah nău ŭch geh ngăn bah nuĭh ƀon lan. Lôch tâm ban ŭch hôm ri ân manh nuĭh mbơh nti ntŭk dăp rgum ntŭk gŭ mhe dĭl, n’glăp tâm nău mbơh gŭ mĭn nău dơi bah trong cao tốc Quy Nhơn – Pleiku. Lĕ rngôch ăp nkual đă ntrơn du ntŭk gŭ mhe ân dơi n’glăp dŏng ri mơ geh tơm prăk gay tĭng ƀư. Gâp dăn đă nău dja ân dơi tĭng ƀư ngăch, ndăn.”

Nău nchrăp ăp dăp na nê̆ an trong nchrăp kan saơ nău nsrôih chính trị âk bah n’gor Gia Lai tâm nău nchrăp an ƀư ntung tơm tơm khlay, nta trong dơh gay buăt nthoi, ntrŭt ntrôl hun hao wăng sa – rêh jêng kon nuĭh ta ntŭk tâm let năp tay.