Tĭng ƀư “Trong hăn Quang Trung” tă bah Thủ tướng Chính phủ rgŏ jă, Gia Lai n’hanh Lâm Đồng dôl rgum mon mhe, nkra rhiăng mblâm jay khuch khat, gay kơl nuĭh ƀon lan ơm đăp mpăn ntŭk gŭ bah năp Tết Nguyên đán 2026.

Tĭng ƀư “Trong hăn Quang Trung” tă bah Thủ tướng Chính phủ rgŏ jă, ntơm bah nar 1/12, ăp đơn vị tahen gŭ kan ta n’gor Gia Lai hŏ du rơh luh hăn ntop kơl rdâk mon tay 100 mblâm jay an ăp rnăk ƀon lan geh rlâm tâm rơh dak bŭk mhe aơ. Tâm trong hăn kan dja, Quân đoàn 34 dơn rdâk mon tay 70 mblâm jay, Bộ Chỉ huy Quân sự n’gor Gia Lai dơn ƀư 30 mblâm jay hôm ƀa ƀă. Ăp mpôl kan nsum lhăt đah n’gâng kan ta ntŭk gay ra uănh tay di nuĭh dơi kơl, nchrăp ăp tŏng ndơ rdâk mon, nuĭh kan, ntŭk gŭ ntŭk sa n’hanh ndơ dŏng an ăp mpôl rdâk mon jay. Ăp đơn vị nsrôih wat jêh, ndơ̆ jao lĕ rngôch 100 mblâm jay bah năp nar 31/1/2026, kơl nuĭh ƀon lan năn wơt Tết Nguyên đán tâm ăp mblâm jay đăp mpăn, nâp uĕh.

Lơ 1/12, Kruanh UBND n’gor Lâm Đồng Hồ Văn Mười leo rơh rƀŭn nchră trực tuyến đah ăp ntŭk, đă ngăch ndăn rdâk ƀư n’hanh nkra mhe ngih jay an ăp rnăk ƀon lan geh nău khcuh khat tă mih sial mhe nơh. Lam n’gor geh 76 ngih jay rlâm lĕ rngôch n’hanh 749 ngih jay khuch, tâm nĕ geh xã Dran lah ntŭk geh nău khuch dŭt âk ngăn dah 46 jay khuch, 17 rlâm n’hanh 6 rnăk rêh dăch dak me Đa Nhim ntrơn ntŭk êng ndal, an geh pă tay neh gŭ mhe. N’gor dơn ngoăy rnoh kơl an 120 rkeh prăk đah ăp ngih jay geh ngih rlâm n’hanh 20-40 rkeh prăk an ăp rnăk nkra tay, nkre lah đă ăp ntŭk uănh nđôi na nê̆ nău dong prăk an di nkô̆ n’hanh ngăch pă neh gŭ an ăp rnăk mô hŏ geh neh, mât đăp mpăn ƀư lôch nău nkra ngih jay ta năp Tết Nguyên đán 2026.