Nar 10/11, Kruanh UBND n’gor Gia Lai Phạm Anh Tuấn hŏ geh siƀŭt kuăl jă lam n’gor nsum ti nkra bah khuch khat phŭt mbrô 13 (Kalmaegi) lơn, ơm đăp mpăn nău rêh nuĭh ƀon lan, sĭt jêng tay n’hanh ntrôl ngăch hun hao wăng sa- rêh jêng kon nuĭh năm 2025. Phŭt Kalmaegi lah phŭt dŭt dăng ntô̆ lăp tâm n’gor tâm bar pe jât năm aơ, lơh khuch khat dŭt jru hô. Nơm geh lor nchrăp rdâng lơh “bah ơm, bah ngai”, n’gor hŏ ntrơn du rlău 300.000 nuĭh, kơl rlău 200 nuĭh luh bah nkual klach rvê bah ir khuch khat mpeh nuĭh.

Lôch phŭt, n’gor geh rlău 50.000 mblâm jay geh khuch khat, tâm nê bơi 1.000 mblâm jay rlâm lĕ rngôch; 2 hê nuĭh khĭt, 8 nuĭh rmanh jru. Lĕ rngôch roh huach nchroh rlău 5.200 rmen prăk. Âk ntŭk ntô ndơ dŏng, lơn lah ta đô thị Quy Nhơn – ntŭk rgum wăng sa, pâl nđaih bah n’gor- geh hăch rlâm âk. Kruanh UBND n’gor Gia Lai kuăl jă lam trong kan chính trị, doanh nghiệp n’hanh nuĭh ƀon lan ntik n’hao nuih n’hâm nsrôih ndôr êng, nsan hao êng, nsum ti rdâk tay ntŭk ntô, ntop kơl nuĭh ƀon lan, mô an geh du hê nuĭh ntlơi êng bah kơi.