Tĭng dăp rgum, ntŭk nchrăp tăm hvi nklăp 200ha, lĕ rngôch tơm prăk ntuh kơl 139 rmen prăk n’hanh mbra dơi an ƀư tĭng rơh tâm di đah nău dơi ntuh kơl tâm ban kơt nău geh ngăn ngăn. Tĭng trong nchrăp ntuh kơl, rƀŏng tât rdâk njêng trong ntĭt leo tăm n’hanh nkret njêng tơm dak si săk tam âk, dŏng công nghệ têh dăng mhe gay njêng luh ăp ndơ tŏng di rnoh săk tam tĭng quy định n’hanh nău ŭch geh tăch rgâl. Wa Lê Minh Thông, Kruanh UBND xã Vĩnh Thạnh an gĭt, Đan Sâm lah tơm dak si geh rnoh khlay, dơi dŏng lam hvi tâm y học cổ truyền n’hanh săk geh hun hao têh.

“Trong nchrăp dja tât ta aơ pơk luh trong mhe tâm dăp rgum tơm tăm bah nău tuch tăm ngăn jêng tuch tăm công nghệ nkret njêng đah ăp rêng tuch tăm nkret njêng đah doanh nghiệp n’hanh nuĭh ƀon lan. Bah aơ nta joi nău kan n’hanh nuĭh kan ta ntŭk đŏng"

Wa Lê Quang Hùng, Giám đốc Sở Y tế Gia Lai an gĭt, Nghị quyết mbrô 72 bah Bộ Chính trị n’hanh Trong nchrăp mbrô 06 bah Tỉnh ủy Gia Lai mpeh hun hao n’gâng kan dak si lvang năm 2026-2030 hŏ ntrŏng hun hao tơm dak si lah ngoăy tâm ăp nău dơn kan an ƀư lor. Yor kơt nê̆, nău an ƀư trong nchrăp tăm tơm dak si ta Vĩnh Thạnh tâm di đah trong nchrăp hun hao bah Gia Lai n’hanh trong rƀŏng nsum bah lam dak.

“Tơm Đan Sâm lah du ntil tơm dak si dŭt khlay n’hanh nsĭt tay nău uĕh dăng an săk suan. Aƀaơ lam ntŭr neh, âk dak hŏ dŏng gay săm ăp nău ji mpeh play nuih, mblơ bu ur. Aơ lah trong nchrăp lor bôk năp ta Việt Nam tăm tơm Đan Sâm đah rnoh hvi. Nuĭh ƀon lan Vĩnh Thạnh nơm mbra geh dŏng bah nkual đŏng”.

Nău an tăm n’hanh nkret njêng dak si Đan Sâm ta xã Vĩnh Thạnh, n’gor Gia Lai mbra rgop mât dŏng geh nău tam săk geh tơm dak si ta ntŭk. Bah nê, njêng suan ntrôl hun hao wăng sa, nta joi nău kan, tĭng kơn jêng rêng rnoh khlay tơm dak si jŏ jong nkre đah nău ŭch tât hun hao n’gâng kan dak si n’hanh tuch tăm công nghệ mhe bah Gia Lai.