Na nê̆, ntơm bah khay 10, Bí thư Chi bộ, Kruanh thôn, Kruanh tổ dân phố n’hanh Kruanh Ban Pah kan Mặt trận ta n’gor Gia Lai dơi geh sa rnoh ntop kơl mhe, uănh tĭng têh hvi ntŭk mât bôk kan. Ta ăp thôn, tổ dân phố âk nuĭh n’hanh du đêt ntŭk mha êng, rnoh ntop kơl ntơm bah 5 rkeh 850 rbăn tât rlău 6 rkeh 550 rbăn prăk/nuĭh/khay; ta ăp ntŭk hôm ƀa ƀă, ntơm bah 4 rkeh 680 rbăn tât bơi 5 rkeh 400 rbăn. Ăp nuĭh râng ăp nău kan êng ƀa ƀă ta thôn, tổ dân phố dơi ntop kơl 1 rkeh 900 rbăn prăk/nuĭh.khay; nuĭh nkre mât bôk kan n’hanh hŭch dơi du hê ri dơi ntop tay 50% rnoh prăk bah nău kan nkre mât bôk kan.

 Wa Vi Văn Trượt- Bí thư chi bộ nkre ƀư kruanh thôn Thôn Thanh Sơn, xã Chư A Thai an gĭt, nău rgâl rnoh prăk ntop kơl ntơm bah khay 10 lah nău rhơn nđơr đah ăp nuĭh dơn na nê̆ nău kan ta nkual ƀon lan gŭ. Păng nkre mât bôk bar nău kan jêng lĕ rngôch rnoh ntop kơl nklăp 8 rkeh 500 rbăn prăk/ khay. Yơn lah, đah nuĭh dơn mât du bôk kan n’hanh hôm rvê nău kan rnăk wâl đŏng, nsĭt geh bah nău kan ta thôn nha mô hŏ tŏng geh nău rêh đŏng. Ntơm bah nău ngăn geh wa Vượt dăn đă n’gor geh tay trong nkra gay ntop kơl cán bộ tâm dâng đăp mpăn, wah jêh uĕh nău kan:

“Đah rnoh ntop kơl aƀaơ, gâp mĭn lah nău oi, gâp ƀư dơi. Hôm ăp nuĭh êng ƀa ƀă mô nkre mât bôk kan ri hôm jêr jŏt . Tĭng gâp n’gor ân geh trong ntop kơl máy móc n’hanh geh ăp rơh kơi năp nti n’hanh nkra ƀư siƀŭt”.

 Ndrel đah trong ntop kơl an nuĭh pah kan tay, Gia Lai rong an rlău 50 rmen prăk ntop kơl nklăp 1.820 nuĭh ân rlu lôch dăp rgum yơn mô mpeh săk dơi ntop kơl tĭng Nghị định 154 bah Chính phủ. Ăp năm pah kan, nuĭh rlu kan dơi ntop kơl dah 0,7 tơ̆ rnoh ntop kơl bah khay bah kơi nê rnôk rlu ranh. Du đêt nuĭh hŏ tŏng năm rlu ranh mô lah dôl geh sa prăk khay rlu ranh, roh suan kan dơi ntop kơl du tơ̆ 10 rkeh prăk/nuĭh. Wa Phạm Thị Tố Hải, Ủy viên Ban Thường vụ Tỉnh ủy, Giám đốc Sở Nội vụ n’gor Gia Lai, an gĭt:

“Rđĭl đah lam dak, Gia Lai gŭ tâm rnoh trok tâm lah dŭt âk. Ngân sách bah n’gor dơn tŏng dơi trok ta rnoh dja dơm. Quy định ta rnoh dja ri mbra đăp mpăn tâm pă prăk ngân sách, prăk trok  tĭng rơh n’hanh an ăp năm bah kơi tay. Lah geh nău rgâl ri n’gor mbra rgâl an đăp mpăn lơn”

 Nău rgâl kơi ntop kơl nuĭh rlu kan dơi n’gor Gia Lai ƀư tâm rnôk dăp rgum tay rmôt kan ta thôn, tổ dân phố lôch dăp rgum. Đah nău ŭch đăp mpăn nău dơi an ăp nuĭh gŭ pah kan tay, nkre geh tay trong ntop kơl ăp nuĭh ân rlu kan yơn mô mpeh săk dơi geh sa prăk bah Trung ương.