Nar ntri (24/9), Tỉnh ủy Gia Lai ƀư Tâm nchră giao ban đah Rnâng kan Tỉnh ủy đah rnâng kan đảng ủy 135 xã, phường gay uănh năl lôch jêh geh nău kan bah trong leo n’gâng kan 2 gưl lôch bơi 3 khay an ƀư. Tĭng siƀŭt mbơh ta tâm nchră, ăp nhih pah kan Đảng, n’gâng kan, MTTQ n’hanh nsum mpôl tâm dâng lăp dŏng kan soih aih, nsĭt geh nău dơi tam. Ntŭk rgum rhŏ dŏng ƀư siƀŭt gưl xã tŏng uĕh đah nău ŭch geh ntop kơl nuĭh ƀon lan n’hanh doanh nghiệp. Lam n’gor hŏ dơn geh bơi 300.000 hồ sơ, tâm nê rlău 90% nkra di n’hanh bah năp nar ton.

Ta tâm nchră, âk nău rgop dăn đă n’gor uănh khlay tâm pă tơm prăk ƀư mhe nhih pah kan ta xã, phường lôch n’glăp nsum; ntop kơl rvăt năp ndơ ntrŭp dŏng công nghệ thông tin, kơi ntop biên chế ta ăp ntŭk kan hôm pah pât. Ăp n’gâng kan tâm dâng dăn đă ntuh kơl ntung trong, dak bât, nhih nti, nhih dak si, jay văn hóa. Tĭng Bí thư Tỉnh ủy Gia Lai Hồ Quốc Dũng, ăp xã, phường ân dăp rgum tay ăp tŏng mpôl kan, kơi ntop cán bộ, rdâk njêng bôk nău kan ngăn ngăn, tĭng ƀư ăp rnoh tât hun hao, nkre đah pah kan n’hŭch ach o, đăp mpăn tŏng geh nău rêh. Wa Hồ Quốc Dũng lah rjăp, gay n’hao dăng lơn nsĭt geh nău dơi tam pah kan, ntrôl dăng tay tâm pă gưl, tâm pă nău dơi kan an ăp xã./.