Nar 29/10, Đại hội tâm rlong rŏng dak n’gor Thanh Hóa tâl 11 hŏ ntơm pơk.

Ntơh măt kruanh rđău kan Ngih dak n’hanh Hội đồng Tâm rlong Nkhôm rnê Trung ương, Groi kruanh dak Võ Thị Ánh Xuân mpư rnê, mbah rhơn ăp nău dơi geh khlay bah Đảng bộ, n’gâng kan  n’hanh ƀon lan n’gor Thanh Hóa hŏ dơi geh tâm năm kan rlău aơ. Nkre lah rjăp, n’gor Thanh Hóa dôl dâk bah năp trong dơh geh têh gay jêng n’gor dâk leo lor bôk năp, n’gor ntĭt leo lor lam dak, rƀŏng tât n’gor ndrŏng uĕh, srăch se, rhơn răm tâm năm 2045 kơt nău ŭch rŏng bah Đảng, Ngih dak n’hanh nău ŭch ma Đại hội Đảng bộ n’gor Thanh Hóa tâl XX hŏ ndơ̆ luh.

Gay dơi tât rnoh dja, Đảng bộ, n’gâng kan, tahen n’hanh ƀon lan n’gor Thanh Hóa ân ntik n’hao nău way ơm dăng janh n’hanh ăp nău dơi hŏ geh; nkra an dơi bah du đêt nău mpăng đêt, rbăn lhơ lĕ ma mô ndra ma lơh n’hanh uănh lhơ; rhuăt luh ăp nău tă ơm gĭt nti jru hvi tâm pah kan rdâk njêng Đảng, rdâk njêng lam trong kan chính trị, tâm pah kan mât uănh ngih dak ta ăp ntil trong kan duh jêr; rlău ăp jêr jŏt, ntul rlong bah năp măt; nsum suan du nuih n’hâm n’hao Thanh Hóa hun hao tay ngăch n’hanh nâp dăng.