Kêng măng (19/8), Groi Kruanh Quốc hội Vũ Hồng Thanh ndrel mpôl pah kan Ủy ban Kinh tế n’hanh Prăk kaih Quốc hội ƀư groi nđôi ăp nău nchrăp ƀư khlay ngih dak n’hanh wăng sa-rêh jêng bah n’gor Lâm Đồng. Tĭng nău mbơh bah UBND n’gor Lâm Đồng, ta lam n’gor geh Nău nchrăp ƀư trong ndeh têh hăn ngăch Bắc-Nam mpeh bah dâng luh nar, lvang Gia Nghĩa-Chơn Thành, jong rlău 124 km, dĭng lĕ rnoh ntuh kơl 25.500 rmen prăk, dơi Quốc hội uănh an nău ntrŭnh ntuh kơl bah khay 6/2024, yơn dôl dơi mbơh ƀư dŭt mbrơi.

Quốc lộ 27C jong 119 km nthoi n’gor Lâm Đồng đah n’gor Khánh Hòa, geh yôk Khánh Lê jong 30km, ntŭk kol hun hao pâl nđaih, nchoăn rdêng ndoh ndơ bah n’gor. Jêh rnôk rgum ƀư kloh ăp wăk kol, djôt dơn trong mkra rlet rlău jêr jŏt bah n’gor Lâm Đồng, ăp nuĭh Mpôl groi nđôi bah Ủy ban Kinh tế n’hanh Prăk kaih Quốc hội uănh lah prêh nuih n’hâm nchrăp lor, dŭt n’hâm tâm trong kan ntĭm rđău, ƀĭt joet; ntĭm kloh du đêt ndơ hôm e nkân, mô hŏ ƀư an dơi rgum mkra. Groi Kruanh Quốc hội Vũ Hồng Thanh lah n’gor Lâm Đồng ntrôl ngăch ăp ndơ ƀư, nău nchrăp ƀư khlay; tâm rgop đah ăp nuĭh ntuh kơl mkra uĕh jêr jŏt wăk kol nta an hao jêng bah ăp nău nchrăp ƀư khoáng sản./.