Ôi ntri (3/12), Groi Thủ tướng Chính phủ Mai Văn Chính ndrel mpôl pah kan Trung ương râng Lễ ntơm dâk kan “Trong hăn jăch ndăn Quang Trung” ndăn ngăch rdâk njêng, nkra jay gŭ an ăp rnăk geh jay gŭ khuch khat, rlâm tă bah trôk nar lơh ta n’gor Lâm Đồng. Lễ ntơm dâk kan dơi ƀư ta thôn Lâm Tuyền 2, xã D’ran, ngoăy tâm ăp ntŭk geh khuch khat dŭt jru hô tâm rơh mih dak bŭk khay 10 n’hanh khay 11 mhe aơ.

Ta rơh lễ Groi Thủ tướng Chính phủ Mai Văn Chính ndrel kruanh du đêt n’gâng kan Trung ương n’hanh n’gor Lâm Đồng ƀư tơm way ntơm rdâk njêng jay mhe n’hanh ntăm păng nchih ndơ kơl “Rdâk njêng an rnăk ƀon lan geh jay rlâm lĕ rngôch tă bah trôk nar lơh” tât 4 rnăk bah xã D’ran. Ndrel đah nê Groi Thủ tướng Chính phủ Mai Văn Chính kơl an 10 nklâm ndơ an ăp rnăk geh khuch khat hô tă bah dak bŭk lơh, mpăn nuih n’hâm ƀon lan rlău jêr jŏt ơm đăp mpăn nău rêh, rdâk tay nău kan mir ba.