Đah bôk nău “n’hao nău way ơm rbăn năm văn hiến n’hanh têh dăng; tâm rnglăp rdâk njêng Đảng bộ kloh ueh, nâp dăng, hăn lor, ueh mhe ta rơh lăp kan mhe; hun hao thủ đô ueh mhe, kloh ueh, hơm răm”, ôi lơ 16-10 lĕ geh rơh ntơm ngăn Đại hội đại biểu Đảng bộ nkuăl ƀon têh Hà Nội tal 18, năm kan 2025-2030 đah nău tât râng bâh 550 đại biểu. Tĭng nău mbơh tơih Chính trị ta Đại hội, năm kan ba năp ăp nău mpŏng ngluh mbơh lĕ geh ƀư tâm ban n’hanh dơi geh rlău, nău wăng sa Thủ đô mô rlu hun hao đah rnoh hao dŭt âk râng geh bâh lam dak. Ntoh ngơi ta rơh Đại hội, Tổng Bí thư Tô Lâm lah na nê̆, neh dak he, Thủ đô he dôl lăp ta rơh rach năm hun hao mhe bâh mpôl rnoi đah rơh nkhêp mhe, dơh nơih n’hanh jêr jŏt, ntul rlong geh âk. Tổng Bí thư nkah đă 7 nău kan, trong kan tơm gay ma Đảng bộ nkuăl ƀon têh an Hà Nội an geh ƀư rgum nău leo kan ntĭm đă tâm năm kan mhe tay. Tổng Bí thư Tô Lâm đă, Hà Nội an geh njêng kơt du nkuăl ƀon têh văn hiến, ueh êng, mĭn kan mhe, mpŏng tât du Thủ đô gĭt blău, ueh mhe, nâp nâl, đah nău gĭt mĭn rơh mhe n’hanh tâm di đah lam ntur neh. Bâh nău nĕ, njêng geh 3 nău mĭn kan mhe, sok dŏng an tâm di âk nău khlăy lịch sử, nău gĭt vât n’hanh công nghệ, ndŏ công nghệ, ndŏ HàNội jêng nkuăl ƀon têh rgum lĕ nău kăl e, nău aƀaơ n’hanh nău rêh let năp tay.