Kêng măng (10/11), Thủ tướng Chính phủ Phạm Minh Chính râng rgum nchră Doanh nghiệp Việt Nam đah nkô̆: "Doanh nghiệp FDI dâk leo lor tĭng ƀư trong hao jêng nđĭr tâm rơh keh mbrô". Rgum nchră lah trong tâm dâl nău mbro n’hanh jĭr lhăt lơn đah Chính phủ Việt Nam đah băl mpôl doanh nghiệp gay rgâl geh ăp ndơ tăch rgâl khlay gay ntrŭt ntrôl nău hun hao bah mpôl doanh nghiệp êng bah dih ngih dak, jêng soih uĕh ngăn ntŭk tăch rgâl ntuh kơl, rgop tâm nău hun hao wăng sa nâp dăng bah Việt Nam.

Ta rgum nchră, ăp doanh nghiệp rhơn rnê ăp nău rgâl mpeh trong uănh hun hao bah Việt Nam n’hanh an lah, nău n’gluh an dŏng ăp nghị quyết kơt: Nghị quyết 57 mpeh ntrŭt ntrôl khoa học, công nghệ n’hanh rgâl blău ƀư mhe; Nghị quyết 59 mpeh lor nchrăp lăp rgum dak bah dih; Nghị quyết 68 mpeh hun hao wăng sa êng bah dih ngih dak; n’hanh Nghị quyết 66 mpeh rgâl dơh pah kan rdâk njêng n’hanh dŏng ƀư pháp luật...  Ăp nău rgop dăn đă Chính phủ n’gluh an dŏng ntĭm nti n’hanh trong tor gĭt lor kloh rvah gay ntruch huêt tâm ƀah đah trung ương n’hanh n’gor, đăp mpăn nău dơn ngoăy tâm mât bôk kan lam dak. Lah ta rơh rgum nchră, Thủ tướng Phạm Minh Chính rtŭt lam nô nău wăng sa, rêh jêng kon nuĭh bah Việt Nam n’hanh lah rjăp: Việt Nam ntrŏng rnoh tât hun hao 8% tâm năm 2025 n’hanh 2 mbrô tâm ăp rơh bah kơi nê, tâm nê ntrôl dăng hun hao wăng sa nđĭr uĕh, wăng sa mbrô lah ân tĭng ƀư, tâm di đah trong rƀŏng hun hao. Chính phủ mbra rgum rđău đă ăp n’gâng kan, ăp ngor ndăn ngăch dâk kan, nsrôih, nkra bah ăp jêr jŏt, tâm rnglăp, lor nchrăp bên di, ngăch rpăch, khoa học, geh nău tam, nsrôih rgâl mhe, blău njêng ƀư mhe. Thủ tướng nsing nơm mpôldoanh nghiệp FDI mbra hăn ndrel tay Việt Nam, ndrel nta trong dơh du jâng wăng sa nđĭr, tâm rlong n’hanh nâp dăng, yor hao geh nsum bah nkual n’hanh lam ntŭr neh./.