Ngih samƀŭt Mầm non Krông Bông, xã Krông Bông, n'gor Dak Lak jêh nglăp nsum geh 1 ntŭk tơm, 2 ntŭk phân hiệu n'hanh 3 ntŭk ngih samƀŭt êng đah 515 kon se. Nău mât kon hŏk, nai ta ăp ntŭk ơm kơl n'hŭch roh đăp mpăn, yơn lah ndơ̆ luh nău mât uănh du ngih samƀŭt ta du ntŭk têh hvi, kon hŏk tâm pă. Wa Lê Thị Thuý Nga, Hiệu trưởng ngih săm ƀŭt mbơh: "Ntŭk gŭ sa ta phân hiệu Măng Non lah pă an ndơ sông sa an 2 ntŭk ngih sam ƀŭt, jêng lah mbra geh nău nchoăn rdeng ndơ sông sa tât du ntŭk ngih sam ƀŭt êng. Phân hiệu Họa Mi ri du ntŭk gŭ sa mbra pă an ndơ sông sa an du phân hiệu n'hanh 2 ntŭk ngih samƀŭt êng, jêng lah mâp jêr jŏt tâm nău lah nchoăn rdeng ndơ sông sa an kon hŏk bah tơm prăk kon nuĭh rgop bah me bơ̆ kon hŏk."

 Rnôk du ngih samƀŭt jêh dăp rgum geh âk ntŭk ngih săm ƀŭt, nău ŭch mât uănh, leo ƀư nău kan ntĭm nti mô dơi kơp tĭng rnoh âk bah ngih samƀŭt tơm. Ta Ngih sam ƀŭt Tiểu học Nguyễn Du, phường Tân Lập, n'gor Dak Lak, nău ŭch dăp rgum nuĭh mât uănh nău kan Đội ta ăp ntŭk ngih sam ƀŭt lah du nău ntĭt. Wa Nguyễn Thị Hương, hiệu trưởng ngih sam ƀŭt an gĭt aƀaơ an dăp rgum nai nti nkre ƀư: "Nkô̆ nău têh ngăn bah ăp ngih sam ƀŭt aƀaơ dôl geh nê lah mô tŏng du hê nuĭh mât uănh nău kan way kan gay rhŏ dŏng an nău kan bah ngih sam ƀŭt ta dŭt âk ăp ntŭk ngih sam ƀŭt ma ŭch geh lah an geh nău blău, nău gĭt blău. Rĭ aƀaơ lah ăp ngih sam ƀŭt dôl kơt lah nglăp nsum, jêng lah an sŏk bah nai ntĭm nti bộ môn aơ mô lah nai ntĭm nti tiểu học luh gay ƀư. Ngăn lah gay geh du hê nai ntĭm nti tổng phụ trách ri mô hŏ geh. Kơp lĕ ma nai ntĭm nti hát nhạc luh ƀư aƀaơ mô hŏ tŏng ăp nău nê đŏng".

Lôch dăp rgum bar gưl tiểu học n'hanh trung học cơ sở, Ngih samƀŭt Tiểu học - THCS Quang Trung, xă Krông Bông, n'gor Dak Lak tŏng ăp jrô nti an 19 jrô nti yơn mô tŏng âk jrô kan, jrô tiăr nti. Wa Nguyễn Viết Bá Hoàng, hiệu trưởng ngih sam ƀŭt an gĭt, bôl ngih sam ƀŭt dơi jao tay ntŭk gŭ bah du đêt ntŭk kan ơm gay pơk hvi ntŭk ntô, yơn mô tŏng dơi nău ŭch. "Lĕ rngôch jrô pah kan bah UBND xă aƀaơ mpôl hên knŭng dŏng ƀư ăp văn phòng mô lah jrô hành chính dơm. Lah an prăk dŏng mô lah trong nchrăp mhâm ƀư gay mpôl hên ntlơi jăng sŏk tay măt neh gay ntuh kơl tay đŏng. Kơt aƀaơ lah mô geh rnoh neh bah nhih pah kan UBND xă ơm ri mpôl hên mô dơi ƀư du ntil ndơ. Aƀaơ mpôl hên mô geh du ntŭk ntĭm nti săk soan êng ƀa ƀă".

Bah meng ăp nău kan geh tât jŏ jong, nău ntrơn rgâl jêng nău kan mhe hôm ntoh luh ăp nau kol hành chính bah năp măt. Du đê̆ ngih săm ƀŭt ân geh ƀư ăp nau kan geh tât rnoh mrô soay, rnoh mrô săk ntŭk kan ndrel samƀŭt. Kan mbrơi ƀư jêh ăp nău kan aơ mra khuch ngăn tât nău kan tăch rgâl, tơm prăk ndrel nău kan bah ngih săm ƀŭt. Wa Bùi Lan Anh - Hiệu trưởng Ngih săm ƀŭt THCS Nguyễn Chí Thanh, phường Tân Lập nkoch nau ngăn: "Ngih samƀŭt gâp lah Trần Bình Trọng nglăp nsum đah Nguyễn Chí Thanh jêng Ngih samƀŭt Nguyễn Chí Thanh. Du ntŭk kan mhe njêng ri lah ân geh rnoh mrô soăy mhe n'hanh rnoh mrô săk ntŭk kan mhe. Công an đă đŏng lah kơt nê đŏng, lĕ bar ntŭk kan ơm ân ndơ̆ rnoh mrô soăy n'hanh ƀư tay rnoh mrô săk mhe ri Công an mơ ân phung hên ƀư dak pông mhe. Jêh ri tât rlău n'gul khay ma aơ phung hên hŏ ndơ̆ dak pông hôm, ƀư nau kan lah mô geh trong tâm di kon nuĭh tâm rnôk mhe nơh".

Dơi saơ, lôch dăp rgum ăp ntŭk ntĭm nti nău nchrăp an n'gâng kan ntĭm n'hanh nti Dak Lak mô knŭng lah dăp tay jrô nti, ma ân kơp di tơm ndơ an tĭng trong ntĭm nti, tĭng phân hiệu n'hanh ntŭk ntĭm nti; nkre nkra ăp nău mô tŏng mpeh nuĭh kan, jrô kan, ndoh ndơ n'hanh ntŭk ntô rhŏ dŏng ntĭm nti. N'hŭch bôk tơm kan lah nău dơi bah rnôk dăp rgum. Nău săk geh ngăn bah nău kan aơ mra geh ntoh tâm rơh bah kơi, rnôk ăp ngih săm ƀŭt mhe ƀư nâp, nău ntĭm nti geh đăp mpăn ndrel kon se tâm ăp ntŭk ngih săm ƀŭt êng êng lŏ geh nău dơi tât ăp nău ntĭm nti tâm ban.