Dơn nău jă bah Kruanh dak Lương Cường n’hanh I ur, kađăch Bhutan Jigme Khesar Namgyel Wangchuck n’hanh I ur kađăch hŏ tât Hà Nội ntơm hăn khâl gưl Ngih dak tât Việt Nam ntơm bah nar 18 tât 22/8. Aơ lah hăn khâl gưl Ngih dak lor bôk năp tât Việt Nam bah Kađăch Bhutan n’hanh I ur kađăch kơp ntơm bah rnôk bar dak njêng tâm boh tâm năm 2012.

Kơp ntơm bah rnôk njêng tâm boh, Việt Nam way uănh khlay tâm boh đah Bhutan, uănh Bhutan lah ngoăy tâm ăp dak hăn lor bôk năp tâm nău tĭng ƀư tât rnoh hun hao nđĭr uĕh, mât nâp ăp rnoh "rhơn răm." Tâm rnôk nê, Bhutan way uănh Việt Nam lah ngoăy tâm  ăp dak an lor gay ntrŭt ntrôl tâm boh bar ding tâm ban kơt ŭch rŏng kơt nti nău tă ơm gĭt hun hao bah Việt Nam. Nsing ta nău tâm boh tâm rnglăp uĕh  lăng, hăn khâl bah kađăch mpơl nău uănh khlay bah Bhutan đah tâm boh tâm rnglăp n’hanh tâm boh đah bar dak, tâm ban kơt nău khlay kan, ntŭk gŭ têh  bah Việt Nam ta nkual; nkre mpơl nău uănh khlay bah Việt Nam đah Bhutan. Hăn khâl gay n’hao tâm boh bar dak lăp tâng jru, nsĭt geh nău dơi, ntrŭt ntrôl ăp trong kan săk geh đah bar dak tâm let năp tay.