Dơn nău jă bah Kruanh dak Lương Cường, Kađăch Hashemite Jordan Abdullah II Ibn Al-Hussein khâl ngăn Việt Nam ntơm bah nar 12-13/11. Hăn khâl geh nkô̆ khlay lịch sử, lah nău kan tâm khâl gưl têh lor bôk năp đah bar dak kơp ntơm bah rnôk njêng tâm boh di 45 năm bah năp (1980-2025). Kêng măng 12/11, lôch rnôk wơt ngăn, Kruanh dak Lương Cường hŏ tâm nchră đah kađăch Jordan. Tâm mông nar rah rơch, nsing nơm ngăn n’hanh tâm gĭt wât nsum, bar kruanh tâm ban ŭch ndrel n’hao tâm boh bar ding hao du kơn prêh mhe. Bar ding ân rdâk nâp tay nău nsing nơm chính trị ma ăp nău kan leo mpôl tâm khâl nsum, lơn lah mpôl kan gưl têh. Nkre ntrŭt ntrôl tâm boh ta ăp trong kan khlay êng ƀa ƀă, tâm nê geh njrăng n’gang neh dak, rnă njrăng, tâm nkoch nău lư, tâm ôp kan nuĭh rnâng kan...   

Tâm trong kan wăng  sa, bar kruanh rđău kan tâm ban ŭch nta trong dơh an nău pơk hvi ntŭk tăch rgâl an ăp ndơ săk geh bar ding, nkre ntrŭt nsôr doanh nghiệp bar dak gŭ mĭn nău dơi tâm boh, ntuh kơl, lơn lah tâm ăp trong hun hao ntŭk ntô ndơ dŏng, wăng sa nđĭr uĕh, wăng sa mbrô, viễn thông, tuch tăm, nkret njêng ndơ geh ƀư tuch tăm… Kađăch Jordan dăn đă bar dak gŭ mĭn ơm pơk trong mpăr sŏng. Bar kruanh rđău kan tâm ôp ăp trong nkra gay ntrŭt ntrôl tâm boh mpeh dak si, lah jâng nsing dăng bah Jordan, lơn lah tâm ăp trong kan but săm ji bah ngai, dŏng công nghệ tâm y học…