Ăp nar êp dŭt năm, rnôk mpôl năch dak bah dih kơt Nga, Hàn Quốc, Trung Quốc... plơ̆ sĭt tay, pâl nđaih mĭn lah tay nău ƀư tơm ngoăy tâm 4 n’gâng tơm wăng sa bah n’gor Khánh Hòa. Ndơn yor pơk hvi đah rnoh âk, nău kan pâl nđaih dôl rgâl an ntrong ƀư uĕh nâp, kơl lor hun hao uĕh nđĭr n’hanh nâp nâl. Kruanh Hiệp hội Pâl nđaih Khánh Hòa, wa Phạm Minh Nhựt an lah nău đă rgâl aƀaơ lah mô dơi mbrơi:

Pâl nđaih uĕh nđĭr, pâl nđaih nâp nâl mô di lah du ntrong leo ndal, ma lah trong mkra khlay bah ăp nuĭh ƀư pâl nđaih aƀaơ. Tâm rnôk kâp nău ntop kơl bah ăp ngih pah kan mât uănh ngih dak ri he ƀư tĭng dâl bah aƀap gay hun hao pâl nđaih nâp nâl. Pâl nđaih aƀaơ nar lơ uănh kơl tât nkô̆ nău hun hao uĕh nđĭr, mât njrăng ntŭk ntô, rnôk he rgâl mbra wăch rgum geh âk năch aƀaơ.

Ta Nkual wăng sa Vân Phong-nkual nuih n’hâm neh dak tĭng Dăp rgum lĕ rngôch lam dak-Khánh Hòa dôl wăch rgum ăp nuĭh ntuh kơl uănh tât ntrong ƀư nkual công nghiệp bri dak yôk nor, tâm di đah trong nchrŏng “Uănh năl ntrong ƀư hao jêng mhe, dăp rgâl tay jâng wăng sa” tâm dự thảo Mbơh an chính trị. Tiến sĩ Phạm Hồng Điệp, Kruanh Hội đồng Quản trị Công ty Cổ phần Shinec, ntŭk kan hun hao công nghiệp bri dak yôk nor ta Hải Phòng n’hanh aƀaơ gŭ mĭn njêng ntuh kơl an Khánh Hòa nkoch nău rgop:

Djăt 3-4 nkual công nghiệp ân êng du nkual an nău ƀư nkra njêng tay ndŏk nja, dak djiă công nghiệp. Yor lah mô tŏng nău, ăp nău khuch ntŭk ntô gŭ âm mbra jêng mpêr n’gar têh an rnôk hun hao uĕh nđĭr. Ngih dak aƀaơ dôl ntrŭt đă ntrong ƀư công nghiệp nkra njêng tay, wăng sa tâm pleh.

Khánh Hòa dôl wăch rgum ăp nău nchrăp ƀư ntung trong tâm ntil nău ndrâm dak lêng logistic, nkual công nghiệp kloh uĕh, công nghệ mhe n’hanh pâl nđaih uĕh nâp ta nkual wăng sa Vân Phong, Cam Ranh n’hanh nkual kiău ma nuih n’hâm Nam Trung Bộ. Hăn ndrel đah wăch rgum ntuh kơl, n’gor ntrôl dăng rgâl samƀŭt hành chính, kơt dŏng trong ƀư “du mpông-du ntŭk”, rgâl mrô trong ƀư n’hanh mbơh rah wah ngăch mkra. Knơm pă kloh nău kan tĭng n’gâng kan, nău kan, mông nar mkra âk samƀŭt ntuh kơl-neh ntu-ndâk ƀư hŭch 30-40%; ăp samƀŭt ăp gưl âk ntŭk kan dơi rhoăt bah đêt khay jŭr hôm đêt pơh. Wa Trần Minh Chiến, Kruanh Ban mât uănh nkual wăng sa n’hanh Nkual công nghiệp n’gor Khánh Hòa an gĭt, nău rƀŏng lah ndâk ƀư du trong na nao n’hanh kloh rah wah, tâm di trong nchrŏng rgâl mhe ntrong ƀư hao jêng. Ban mât uănh ƀư bôk trong ntop kơl nuĭh ntuh kơl bah hăn uănh, ƀư samƀŭt rhăch nău, nchrăp dăp rgum tât sŏk neh n’hanh boăt nthoi ăp n’gâng kan, nău kan gay nău nchrăp ƀư dơi mbơh ƀư dơh lơn.

Gay dơi kuăl jă ăp nuĭh ntuh kơl, mpôl hên rgâl nău mĭn mât uănh rgâl nău mĭn hăn ndrel, hăn ndrel nuĭh ntuh kơl mkra wăk kol. Mpôl hên mbra lah nuĭh mbơh ntĭm way kan mpeh ntil nău ntuh kơl geh tŏng ăp nău mbơh, boăt nthoi ntŭk kan mât uănh ngih dak gay ntuh kơl dơh ngăn gay mbơh ƀư nău nchrăp ƀư.

Âk nău nchrăp ƀư têh dôl dơi Khánh Hòa kuăl jă tâm lvang 2025-2030, rgum tâm ngih wâl logistic, ndrâm dak lêng ndơ̆ hăn dak bah dih, nkual công nghiệp kloh uĕh-công nghệ mhe, nkual tăch rgâl dah rŏng. Aơ lah ăp nău rƀŏng tâm di đah nău nchrŏng hun hao “ăp ntŭk prăk kaih dak bah dih, nkual tăch rgâl dah rŏng rơh mhe” n’hanh “rkum wăng sa dak lêng âk nău kan” dơi nkoch tâm dự thảo Mbơh an Chính trị. Ndrel đah nău pơk hvi nău dơi, n’gor đă săch nuĭh ntuh kơl ntơm bah bôk năp gay dêr nău nchrăp ƀư n’gul gâl, mbrơi ngăch mô lah mô tŏng soan. Bí thư N’gor ủy Khánh Hòa wa Nghiêm Xuân Thành lah rjăp:

Ăp doanh nghiệp geh soan mô lah tâm ton. Lah mô geh soan ma an ƀư, mô nchrăp ƀư hăn uănh, kâp jêh uănh, mbra n’glơi an âk nău tih. Yor rĭ, an rgâl bah hăn uănh an jêh hăn uănh n’hanh săch bôk năp. Săch bôk năp dŭt khlay. Tâm rnôk aơ mô an geh nău hành chính jâk, ma an săch tâm rnoh an kơt dŏng AI, ndơ uănh lah na nê̆, kơl rhoăt đêt mông nar ŭch nău nchrăp ƀư.

Uănh lĕ rngôch, bah pâl nđaih uĕh nđĭr tât công nghiệp tâm pleh, bah rgâl nkra samƀŭt tât rgâl mhe ntrong ƀư hao jêng, Khánh Hòa dôl na nê̆ rgâl nuih n’hâm bah Dự thảo Mbơh an Chính trị Đại hội 14-hun hao ngăch, nâp nâl n’hanh nsing tâm ăp nuih n’hâm mhe. Bah nău mĭn rhŏ kan dơi n’gluh an bôk năp, rnôk nuĭh ntuh kơl dơi săch kloh rah wah n’hanh rnôk hao jêng hăn ndrel đah mât njrăng ntŭk ntô gŭ âm, Khánh Hòa geh tŏng nkô̆ nău gay hăn lăp lvang hao jêng 2 mrô, jêng ntŭk hao jêng mhe bah duyên hải Nam Trung Bộ n’hanh lam dak.