Nar 1/10 ta Nha Trang, Đại học Kinh tế nkual ƀon têh Hồ Chí Minh kan nsum đah UBND n’gor Khánh Hòa ƀư Tâm nchră dak bah dih “Dak lêng let năp tay 2025”. Tâm nchră rgum bơi 50 nuĭh khoa học đah rlău 50 nău dăn đă bah Mỹ, Hàn Quốc, Ý, Malaysia, Singapore. Ăp nuĭh rnâng kan an lah, gay ntik n’hao săk geh dơh uĕh, Khánh Hòa ân geh du ntŭk rgum gŭ mĭn công nghệ đại dương têh uĕh mhe, ƀư jâng nsing ndrel blău ƀư mhe, buăt nthoi Ngih dak, doanh nghiệp, mpôl học thuật n’hanh nsum mpôl.

Kruanh rđău kan UBND n’gor Khánh Hòa lah rjăp tâm nchră lah rnôk gay n’gor ndrel ăp nuĭh khoa học, doanh nghiệp n’hanh nsum mpôl nta trong dơh nkra ƀư, lah rjăp nău tâm krêp lhăt đah n’gâng kan ta ntŭk n’hanh nuĭh học thuật tâm nău an ƀư ăp trong kơl hun hao wăng sa dak lêng. Ăp nău nchrăp lor dăn đă, nău rgop mbra njêng jâng nsing mhe, kơl Khánh Hòa jêng nkual hun hao nâp dăng, rlai lăp nsum đah nău rêh nkual dak lêng n’hanh công nghệ têh uĕh mhe.