Tât aƀaơ, lam n’gor Khánh Hòa lĕ jêh ăp trong kan ƀư nchrăp an rơh săch đại biểu Quốc hội khóa 15 n’hanh săch đại biểu HĐND ăp gưl. 65 xă, phường, đặc khu lĕ uănh an 1.123 nkual nklăch phiếu, tâm ban đah 1.123 rmôt săch. Aơ lah rmôt na nê̆ ƀư ăp gưl kan bah mât uănh săk nuĭh ƀon lan, nchrăp ndoh ndơ ngih wâl tât ƀư nklăch phiếu, kơp phiếu, đăp mpăn rơh săch ƀư di nău ntrŭnh. Tĭng Nghị quyết bah Hội đồng săch ngih dak, Khánh Hòa dơi săch 12 đại biểu Quốc hội khóa 16, đah 20 nuĭh dơi săch ta 4 ntŭk săch. Đah HĐND n’gor năm kan 2026-2031 geh 108 nuĭh dơi săch gay săch 67 đại biểu. Ta gưl xă, lam n’gor săch 1.392 đại biểu. Tât rnôk aơ, ăp ntŭk lĕ jêh hiệp thương rơh tal 3, đăp mpăn di dăp gưl, nuĭh n’hanh tâm di tĭng nău ntrŭnh.

Ndrel đah jêh ƀư hiệp thương, nău ƀư n’hanh nchih săk nuĭh ƀon lan dơi mbơh ƀư tâm ban, kloh rah wah. Ta xă Xuân hải, săk nuĭh ƀon lan lĕ dơi prăp ta 17 nkual nklăch phiểu. N’gâng kan ƀon lan kơp uănh tay, joi nu nău, nkre nchrăp gĭt nu nău lor, ngăch mkra ăp nău ntoh mhe, đăp mpăn nău dơi bah nuĭh ƀon lan. Wa Nguyễn Trúc Hòa, Kruanh UBND xă Xuân Hải, n’gor Khánh Hòa an gĭt:

Xă dôl nchrăp prăp săk ăp nuĭh dơi săch ta lĕ rngôch nkual nklăch phiếu. Tâm năm tât, UBND xă ntĭm rđău kơp uănh, gĭt nu nău tâm ƀon lan n’hanh nuĭh ƀon lan; ngăch mkra ăp nkô̆ nău geh tât phong, mbơh nău tih lah geh; nkre n’hao trong kan đăp mpăn rnă njrăng bah năp, tâm n’hanh jêh nar săch.

Mô knŭng ta nkual têh, ta ăp ƀon lan mper dak lêng, ntŭk geh âk nuĭh ƀon lan joi ka ƀa ƀơ hăn dak lêng jong nar, trong kan kơp uănh ƀon lan dơi ƀư na nê̆ lơn. Ăp tổ dân phố tâm rgop rmôt công an nkual tât tĭng rnăk uănh nu nău, gĭt rnoh nuĭh pah kan hăn dak lêng. Ta Tổ dâb phố Thành Đạt, phường Nam Nha Trang, ntŭk geh rlău 1.600 nuĭh ƀon lan, tâm nĕ rlău 200 nuĭh ƀư kan dak lêng, nău kơp uănh dơi ƀư ƀa ƀơ, tĭng na nê̆\ nuĭh ƀon lan. Wa Nguyễn Thị Hoa, Tổ trưởng Tổ dân phố an gĭt:

Gâp tĭng na nê̆ nuĭh ƀon lan ta ntŭk. Mpôl hên tât kơp tĭng rnăk. Tâm rgop công an nkual uănh nđôi dữ liệu. Nuĭh ƀon lan hăn dak lêng bah 1 pơh geh rnôk tât du khay, rnăk wâl mbơh săk nuĭh ƀon lan. Mpô hên tĭng n’hêl na nê̆ ta ƀon lan gay rgŏ jă nuĭh ƀon lan hăn săch.

Tâm ban đah nău kơp uănh săk nuĭh ƀon lan, trong kan săch dơi ƀư lam hvi, rgop n’hao nău wât n’hanh lĕ đah nău kan bah nuĭh ƀon lan. Trong mbơh nkoch bah dâng, ăp rmôt kan nsum mpôl, rmôt kan ta ntŭk mât nkoch trêng ƀa ƀơ, kơl ƀon lan gĭt kloh mông nar, ntŭk nklăch phiếu, kơt bôk nău kan ƀư bah ăp nuĭh dơi săch. Bah lơ 26/2 tât 14/3, ăp ntŭk kan, ƀon lan ƀư rƀŭn nchră mâp nuĭh ƀon lan, nta nơih an nuĭh dơi săch ƀư tĭng nău dơi rgŏ jă săch tĭng nău ntrŭnh, nkre kơl ƀon lan wât kloh lơn mpeh nuĭh săch lor rnôk ƀư tĭng nău dơi săch. Wa Võ Chí Vương, Giám đốc N’gâng kan Nội vụ n’gor Khánh Hòa an gĭt:

Nkoch trêng na nao bah aƀaơ tât nar săch, mbơh nkoch bah xă an pơk na nao ăp nar ăp nkô̆ nău mpeh săch gay nuĭh ƀon lan nkah gĭt tât nău săch, nkah gĭt nar 15/3 hăn săch. Jêh rnôk mbơh săk nuĭh săch, an răk na nao săk nuĭh săch.

Jêh uănh nđôi trong nchrăp ta bah dâng, kruanh n’gor Khánh Hòa đă ăp ntŭk tĭng tay nu nău ngăn, nchrăp gĭt nău ŭch rŏng bah nuĭh ƀon lan, nkra n’hao nkoch trêng, geh nău tâm ban ŭch n’hanh tâm ban ŭch tâm ƀon lan, rgop ƀư lôch uĕh nău săch. Wa Trần Phong, Kruanh UBND n’gor Khánh Hòa, lah rjăp:

 Đah nău kan săch ri nkoch trêng tay geh nău tơm dŭt n’hâm khlay, nkoch trêng gay nuĭh ƀon lan wât mpeh nkô̆ nău bah rơh săch, du ding gay nuĭh ƀon lan wât mpeh lĕ nău kan, nău dơi bah nuĭh ƀon lan. Tă bah nĕ, gay nuĭh ƀon lan wât, ŭch kơl êng, hăn săch.

Đah nău nchrăp tâm ban, rjăp, Khánh Hòa dôl jêh ăp gưl nău tĭng di ngăch, đăp mpăn ăp nuĭh ƀon lan dơi râng săch da dê, rgop an lôch uĕh bah Nar rgum săch n’hanh ndâk njêng n’gâng kan ƀon lan nâp nâl.