Tâm nkuăl dak lêng Đầm Bấy, Vịnh Nha Trang, n’gor Khánh Hoà, ăp ntŭk rong ka ma nhựa HDPE dôl rgâl ma tơm si ơm. Ntrong kan rong ma nau kan ƀư mhe ri geh nkra nâp, dơi rdâng ma sial têh, rgum camera tĭng uănh ntŭk ntu ndrel rnôk rong. Rnơm nê, nŭih rong huch prăk manh nŭih, nkre n’hao nau dăng geh. Ăp nau mô ueh bah ntŭk rong nơih djơh, khuch tât ntŭk ntu dak lêng... ăp nhoat geh rklaih rnơm nau kan nkra ntŭk rong ma ma nhựa tâm rgop ma ndơ dŏng kan mhe.  Wa Vũ Khắc Mười, nŭih râng rlong ƀư nau kan rong ka tĭng trong mhe tâm Đầm Bấy, mbơh, ntơm bah nau geh bôk năp, nŭih ƀon lan hŏ ƀư rêng hvi lơn nau kan geh dơi:

‘Dĭng lĕ ăp ntŭk rong, jal, sre ntăng ndrel camera, prăk ntuh kơl bôk năp nklăp 281 rkeh tâm du ntŭk rong, tâm nê tơm prăk Qũy Thiện Tâm kơl an n’gul rnoh prăk hôm. Rđil ma nau geh ƀư mât rong ma nong kơt ơm, nau kan rong ma nong HDPE kơl an n’huch ngăn prăk manh nŭih kan. Bah năp nơh, du nong rong ơm ri du hê nŭih ƀư nau kan dơi rong nklăp 10-15 tấn, hôm rong ma nong HDPE mra geh rong ntơm 40-50 tấn lah geh dơi đŏng”.

            Nau kan rong tâm dak lêng tĭng nau kan mhe geh n’gor Khánh Hoà ƀư tâm âk ntŭk rong kơt Vân Phong, Nha Trang, Cam Ranh. Nau ngăn ân saơ, nau kan aơ mô êng knŭng n’hao nau dăng ma hôm kơl an nkân nau ueh bah ntŭk ntu rong, joi klo tu tơm ndrel đăp mpăn ndơ sa, ăp nau ueh khlay gay ntŭk rong tui ka hun hao nâp nâl. Nkre lah, aơ kŏ la nau kan ƀư ăp nhoat leo nau rong mhe hăn dak lêng, huch nau sŏk joi ka ngai kơh. Đah trong dak lêng bơi tât 500km, 6 vịnh têh ndrel rlau 200 gôl dak êp kơh, Khánh Hoà geh nau dơi gay hun hao nau rong ka dak lêng têh. Tĭng Groi Giáo sư, Tiến sĩ Nguyễn Chu Hồi, Groi Kruanh rnâng kan rmôt rong kan Việt Nam, gay rong ka dak lêng nâp nâl ân rgum ân tâm di ntŭk rong kan dak lêng ndrel uănh kloh nau geh dơi ăp nkuăl kan:

            ‘Khánh Hoà geh 6 vịnh dak lêng, ăp vịnh geh nau dơi ndrel nau dăng êng. Lah geh dŏng ƀư nau kan tâm kơt, kơt lah moh ntŭk hun hao ndrâm dak, ri mra geh tât nau khuch mpeh nau geh dơi ngăn ndrel tâm rkeh mpeh ntŭk nơm ƀư rong ka đŏng. Ndri ma nơm ân geh uănh năl nau geh dơi dăng bah ăp vịnh. Kơt lah vịnh Nha Trang geh nau dơi êng êng ma Vịnh Vân Phong. Rnôk dŏng ân tâm di nau dơi ndrel nau geh dơi bah ăp nkuăl vịnh ri rnoh geh leo nsĭt mra prêh ngăn, nkre n’huch ngăn nau khuch bah nau tâm rkeh”.

            Năm 2025, rnoh geh tui ka bah Khánh Hoà geh rlau 280 rbăn tân, rnoh geh prăk tăch luh nklăp 870 rkeh đôla, geh bơi tât 37% rnoh geh tăch luh bah n’gor, tâm 3 khay bôk năm aơ, rnoh geh tui ka geh nklăp 60 rbăn tấn, tâm nê geh 52 rbăn tấn, rong rlau 8.100 tấn. Yơn lah, tâm rnôk nau geh dơi bah tui ka geh êng huch ndrel nau đă rdâng sŏk joi tih dôih IUU nar lơn ma nâp, nau ntrơn dăng tă bah nau sŏ joi jêng nau mât rong tâm rgop nê lah nau tâm di. Ntơm năm 2025, Khánh Hoà geh Chính phủ ân ƀư rlong hun hao nau rong tâm dak lêng tĭng nau prêh mhe. Tĭng nau nchrăp tât năm 2029, nkuăl dak lêng tât 3 hải lý mra rlong ƀư geh 240 ha, rnoh geh 3.600 tấn, nkual 3-6 hải lý nklăp 200 ha, rnoh geh rlau 5.100 tấn. wa Trịnh Minh Hoàng, Groi Kruanh UBND n’gor Khánh Hoà mbơh, nkuăl dôl bonh đă ƀon lan ntuh kơl ntŭk rong ma ndơ dŏng mhe ndrel dŏng nau kan prêh mhe gay n’hao nau dăng:

            ‘Rnôk aơ, n’gor Khánh Hoà rgum ndâk ăp nau kan, nau ntrŭnh ndrel rgum ƀư nau dăng dơi tă bah Trung ương, rgum nau tơm bah n’gor gay ntrŭt dăng nau rong ka dak lêng nau kan prêh. Đah tơm prăk, khoa học-công nghệ ndrel tâm rgop ma ăp ntŭk kan khoa học, tâm boh nau mât rong, ntŭk ƀư nau kan, nau trŭnh mra geh tâm rgop rjăp ma ăp rnăk ƀon lan, đah ăp nau tâm boh kan nsum mhâm ƀư ân săk tam ngăn”.

            Tĭng ăp nŭih mbơh ƀư nau kan, nŭih mât kan, gay hun hao mât rong tâm dak lêng ueh mhe ân geh njêng trong tâm rgop rjăp đah rmôt kan tăch rgâl, ntŭk tâm boh mât rong ndrel nŭih ƀư mat rong, nkre ƀư tay nau kan ê nkra mât rong tĭng trong blau mhe. Kruanh n’gâng kan tuch tăm ndrel ntŭk ntu Phùng Đức Tiến mbơh, Khánh Hoà ân geh mât ueh nau dăng dơi gay hun hao nau mât rong tâm dak lêng ndrel geh năl lah nkuăl ƀư leo trong lor, leo trong mât rong tâm dak lêng tĭng trong kan prêh bah neh dak:

            ‘Lah geh nau rđau kan rjăp bah Ngih dak, ăp n’gâng kan, ntŭk kan hăn nsum ma ntŭk kan tăch rgal ndrel nŭih ƀon lan, ngăn lah Khánh Hoà mra pơk njêng ăp ntŭk kan tăch rgâl têh tâm trong hun hao tui ka. Rnôk rgum dơi bah ăp ntŭk kan têh râng ri mra njêng ntŭk tơm mât rong ka, hôm ăp ntŭk kan jê̆, ntŭk tâm boh kan nsum râng, mra njêng ƀư ăp ntŭk tơm khlay, geh nkuăl mât rong êng bah nau geh dơi, rgâl mhe nau kan ndrel ƀư tay nau kan mât rong, ê nkra”.