Tĭng nău mbơh UBND n’gor Khánh Hoòa, 9 khay năm aơ, wăng sa bah n’gor hao jêng tay đăp mpăn, GRDP geh 7%. Ăp ntil nău lŏ mir, công nghiệp, nău rhŏ mât jâng nsan hao uĕh da dê. Sŏk an tơm prăk Ngih dak rlău nău nchrăp. Ăp nău kan nkra njêng, pâl nđaih n’hanh nău rhŏ dôl rdâk hao na nê̆. Doanh nghiệp tâm n’gor Khánh Hòa lĕ jŭt ngih rông mpông sat, pơk hvi nău kơl an manh jay gŭ thuk prăk an kon nuĭh nău geh đêt n’hanh phung pah kan. 3 bôk nău kan rƀŏng tĭng lam dak geh săk rnglăy uĕh da dê, rgop rgâl ngih wâl ntung trong n’hanh nău rêh nkual jru ngai.

Tĭng wa Nguyễn Khắc Toàn, Kruanh UBND n’gor Khánh Hòa, bah meng ăp nkô̆ nău uĕh, ƀon lan geh mô đêt ntŭk kol. Tâm nĕ, pă an prăk ntuh kơl nsum mhe geh rlău 44%, yor wăk kol neh n’hanh ntŭk nthoi dăp rgum jêh nglăp nsum hành chính. Aơ lah nău n’gor dôl rgum dôh rklaih:

 Mpôl hên uănh mĭn an dôh rklih ăp nău nchrăp ƀư jêr jŏt, wăk kol, mpôl hên lĕ tâm pă ăp đồng chí kâp UBND n’gor mât uănh tĭng gưl, tĭng ntil nău. Ƀư rƀŭn ƀa ƀơ, ntrŭt đăp, dôh rklaih nking n’gang năm tât. Mpŏng đah ăp nău ƀư nĕ, nsrôih mkra jêr jŏt, đăp mpăn hao jêng.

Kruanh N’gâng kan Nguyễn Hải Ninh uănh lah prêh nău nsrôih bah Khánh Hòa tâm ntĭm rđău, ƀĭt joet, rdâk nsơm nkra njêng, ntrôl dăng rgâl mrô hành chính công n’hanh kơt dŏng KPI tâm uănh lah, mât uănh cán bộ.

Wa Nguyễn Hải Ninh mĭn lah, jêh nglăp nmsum, Khánh Hòa geh ntŭk ntô hun hao dŭt têh, đah nău geh n’hanh nău dơh đêt ntŭk dơi geh, kơt kơh dak lêng jong ngăn lam dak, trong têh ngăn ngăch, tach ndeh păr, ntŭk ŭnh nar n’hanh pâl nđaih lam dak. Yor nê, Khánh Hòa an nkre rơih jăng ngăch ăp ntŭk kol gay dơi geh nău rƀŏng hao jêng 8,1% tâm lĕ năm 2025, nkre ƀư săk rnglăy ăp nghị quyết mpeh trong ƀư, nău kơl êng, lơn lah, gay an rgâl mhe an lĕ năm kan, Kruanh n’gâng kan Nguyễn Hải Ninh lah:

Lĕ geh âk nuĭh ntuh kơl dŭt têh tât Khánh Hòa hôm. Ndrĭ yan an gŭ gay uănh mĭn tay ăp nău nchrăp ƀư ta Nkual ƀon têh, nkual mô soăy m’hâm ƀư? An geh nău kơl moh ndơ? Nkual tăch rgâl dah rŏng m’hâm ƀư? Rgâl mhe moh ndơ? Lah mô ri ăp nuĭh ntuh kơl mbra ƀư tĭng gưl kơt nâm ơm, mbra mô dơi hao ngăch, rƀŏng trong bah n’gor hăn ndrel đah trong nchrŏng bah ngih dak.

Đah nău geh, nău dơh ơm geh n’hanh nău lăp dŭt n’hâm bah lĕ trong chính trị, Khánh Hòa dôl dâk ta năp nău rgâl hao dăng, jêng ntŭk wăng sa dak lêng, pâl nđaih n’hanh nău rhŏ kan mhe bah nkual Nam Trung Bộ. Ăp tâm ton ntop kơl, dôh rklaih jêr jŏt bah ăp n’gâng kan nău kan Trung ương dơi mpŏng kâp mbra nta tay nuih n’hâm an Khánh Hòa ƀư rgâl nău rƀŏng hao jêng 8,1% tâm năm 2025.