Tỉnh ủy Khánh Hòa mhe ƀư tâm dâl nău đah Rnâng kan Tỉnh ủy đah cán bộ công chức, viên chức gưl xã năm 2026. Tâm nchră hŏ dơn geh 210 nău rgop bah cán bộ, công chức, viên chức ta 64 xã, phường. Ăp nău dăn đă rgum tâm ăp nkô̆ nău dăp rgum tay nuĭh kan, tâm pă cán bộ, trong kơl, rgâl dơh glêh siƀŭt, rgâl mbrô n’hanh prăk dŏng kan tâm dâng.

Âk n’gâng kan tâm dâng nkoch lah jâk r’ah nău kan rnôk rnoh cán bộ, công chức mô hŏ âk tâm ban đah rnoh nuĭh n’hanh nău ŭch geh dơn kan. Âk phường mpưm nuĭh, ntŭk gŭ hvi, rnoh srêt gŭ ngăch yơn biên chế mô hŏ dơi tâm pă tâm di, ƀư cán bộ ân nkre dơn âk nău kan.

Wa Trương Thị Thu Thảo, Groi Kruanh mpôl Rdâk njêng Đảng phường Nam Nha Trang, n’gor Khánh Hòa an gĭt, rnoh nău kan hao âk ngăch, yơn nsĭt geh bah âk cán bộ ri hŭch:

“N’gâng kan ta ntŭk geh âk oh nô rlu kan n’hanh ntrơn ntŭk pah kan, nău kan mpet jâk lơn tâm rnôk nê aƀaơ mô hôm geh prăk ntop kơl tay 30% an nhih pah kan Đảng. Lôch mât kơt ơm 6 khay aƀaơ prăk khay hŭch âk, mpet jâk nău kan âk jêng âk oh nô rgâl nău kan gay tâm di đah nău geh, nău rêh rnăk wâl”.

Aƀaơ, Khánh Hòa geh 4 phường geh rnoh nuĭh rlău 100.000 nuĭh n’hanh rlău 10 xã, phường geh rnoh âk rlău 50.000 nuĭh. Âk ntŭk dăn đă n’gor an lor kơi ntop biên chế an ăp ntŭk âk nuĭh; nkre ơm an ƀư tĭng ntŭk gŭ pah kan n’hanh leo sơch lăp nuĭh kan gay hŭch bah mpet jâk an gưl xã. Wa Phạm Ngọc Hải, Bí thư Đảng ủy xã Tây Khánh Sơn an gĭt, rnôk nău kan âk, nuĭh đêt, n’gâng kan ta ntŭk dŭt ŭch geh dŏng công nghệ thông tin gay n’hao nău dơi nkra nău kan. Yơn lah, dŭt jêr jŏt aƀaơ lah mô tŏng prăk ntuh kơl:

“Lah cán bộ, công chức mpôl hên dơi dŏng ăp phần mềm dja ri păng mbra mpêt nkrem mông nar ngăn ngăn, nsŏng kơl geh nău tam lơn, săk blău rhŏ dŏng an nuĭh ƀon lan n’hanh doanh nghiệp mbra uĕh lơn. Nău khlay lah prăk dŏng gay rvăt phần mềm bản quyền, dăn UBND n’gor kơl an prăk gay rvăt dŏng lah mô ri n’gor rvăt, lôch nê, tâm pă gưl, tâm pă nău dơi dŏng an cán bộ công chức bah n’gor tât xã gay mpôl hên tât dŏng”.

Lôch rnôk djăt ăp nău rgop ta tâm nchră, wa Trần Phong, Bí thư Tỉnh ủy Khánh Hòa đă ăp n’gâng kan ndăn ngăch joi trong droh rklaih ăp jêr jŏt mpeh n’glĕ nău dơi, nkre rgum ăp nău dăn đă rlău nău dơi gay mbơh Trung ương mĭn uănh nkra.

“Dăn đă ăp nhih pah kan, n’gâng kan n’hao dăng kan nsum, lor nchrăp lơn đŏng, tâm pă cán bộ grêt dăch tĭng ntŭk kan, rƀah gĭt nău lư, wăk kol, ngăch nsŏng kơl an Tỉnh ủy, UBND n’gor. Lĕ rngôch ăp nău ôp dja ân rgum tay, njuăl an 64 xã, phường, ân geh nău ơh, dơi lah mô? Ân kâp ri nuĭh kâp?”.

Mpôch dŭt tay tâm nchră, âk nkô̆ nău bah ngăn ngăn tâm dâng ta Khánh Hòa hŏ dơi n’gluh du trong pơk sŏng dăng, bah mpet jâk nău kan, mô tŏng biên chế, hŭch prăk khay tât jêr jŏt mpeh prăk dŏng rgâl mbrô. Ăp nău dăn đă bah cán bộ, công chức, viên chức ta 64 xã, phường mô dơn an mpơl saơ nău ŭch rŏng bah rmôt kan tâm dâng ma hôm an saơ nău ŭch geh jăch ndăn gay wat jêh trong tĭng, trong kơl tâm di đah ngăn geh rnoh nuĭh, ngăch srêt gŭ n’hanh rnoh âk nău kan aƀaơ. Nău n’gor đă ra uănh tay, ơh na nê̆ tĭng nău dăn đă dơi mpŏng mbra ơm rgop droh rklaih jêr jŏt đŏng, nta trong dơh gay rmôt cán bộ tâm dâng đăp mpăn pah kan, n’hao nău dơi tam rhŏ dŏng an nuĭh ƀon lan n’hanh doanh nghiệp ta n’gor Khánh Hòa.