Tâm năm kan 2020-2025, công nghiệp n’hanh ŭnh nar lĕ geh njêng nău mpơl ueh ngăn ta Khánh Hoà, tâm rgop n’hao nău geh na nê̆ râng geh du hê nuĭh geh rlău 113 rkeh prăk/năm. Công nghiệp ta Vân Phong, ŭnh nar ta Nam Khánh Hoà ntơm geh tâm di đah pâl nđaih Nha Trang n’hanh Cam Lâm. Ăp nău mhe aơ an saơ, công nghiệp n’hanh ŭnh nar dôl ntơm geh jêng 2 jrŏng kan tơm mhe, ndơ̆ Khánh Hoà ntơm lăp ta “rach năm hun hao 2 rnoh mbrô”.

Nău nchrăp kan mbơh tơih mpeh chính trị Đaị hôị Đảng bộ n’gor Khánh Hoà tal 1, năm kan 2025-2030 lah na nê̆, gay ma dơi ƀư an n’hao nău kan tơm công nghiệp n’hanh ŭnh nar, an geh “ntrôl kan ntơm geh ƀư tay, rgâl mhe n’hanh n’hao an săk rnglăy doanh nghiệp ngih dak tĭng nău kan ta ntŭk tăch rgâl, an tâm di đah nău kan lam ntur neh mpeh mât uănh nău kan”. Nău aơ lĕ geh dơn ngoăy đah nău ŭch hun hao bâh ăp doanh nghiệp ta n’gor. Wa Trịnh Thị Hồng Vân, kruanh Công ty Yến sào Khánh Hoà nkoch.“Công ty mbra geh ndơ̆ n’gâng kan yến sào jêng trong kan tơm, khlăy. Công ty mbra ƀư an kloh ueh, lăp kan ndrel, nchrai nău kan ăp ntŭk pah kan mô săk rnglăy. Mpôl hên mbra ntrôl dăng rgâl mhe rnoh mbrô. Ngăn lah, rmôt pah kan an geh ƀư ntuh kơl tay máy mok ndơ dŏng ueh mhe gay ma tâm di đah nău ŭch geh ƀư”.

Ndrel đah n’hao ăp trong kan công nghiệp way ơm Khánh Hoà hôm nha an geh âk nău kan công nghệ mhe kơt ndơ dŏng điện tử, bán dẫn, nău mĭn kon nuih ƀư, ntŭk mât rnoh mbrô ngih dak. Gay ma mpŏng tât an hun hao nkŏ mpŏng kan aơ, n’gor an geh tâm rgop trung ưong ƀư lôch trong hăn, tâm rgop bâh tach ndeh păr lam ntur neh Vân Phong, Cam Ranh tât trong hăn têh Bắc- Nam, Đông - Tây n’hanh trong loih hăn têh. Wa Trần Minh Chiến, kruanh rnâng kan mât uănh nkual wăng sa n’hanh nkual Công nghiệp n’gor Khánh Hoà knơm an lah, rnôk n’gor lĕ ƀư ueh tŏng neh, điện dak đăp mpăn, nău kan kơl an tŏng ăp, nuĭh ntuh kơl an geh săch đăp mpăn pă prăk kan jŏ jong."Nău dơh nơih ngăn lah ăp nău nchrăp kan lĕ geh an dŏng. Lam n’gor Khánh Hoà lah du mblâm duk, rdâng kan mât kan ta nkual wăng sa n’hanh nkual công nghiệp lah du trong tơm, ntop gay ma ndơ̆ an Khánh Hoà hun hao 2rnoh mbrô. Nău ŭch lah kơt nĕ yơn an geh săch nuĭh ntuh kơl geh nău dơi, nău kan an geh nău tâm di leo kan ueh”.

Ndrel đah nău kan công nghiệp, lah nău kan tơm mpeh ŭnh nar. Lôch geh dơn ngoăy, nău dơi kan aơ bâh Khánh Hoà lơ ma ntoh lư. N’gor geh nău ŭch hun hao điện sial ta bah dih, điện măt nar, điện khí LNG n’hanh điện hạt nhân, ndrel đah trong điện ueh mhe. Ngăn lah, 2 nău ƀư điện hạt nhân ta mpeh ba dâng Khánh Hoà, dơi geh uănh lah geh nău kan tơm khlăy bâh ngih dak, pơk trong an Khánh Hoà ntŭk hun hao mhe, ndrel đah công nghiệp kơl kan êng, nău kơl mpeh kĩ thuật n’hanh ntĭm nti nuĭh kan ueh mhe. Wa Hồ Xuân Ninh, Giám đốc ntŭk kan công thương Khánh Hoà, an git n’gor dôl nchrăp lĕ nuĭh kan an nău kan khlăy aơ.. “Aƀaơ, nău trok ntrơn ntŭk gŭ mô di lah nău kan têh khlăy, nău kan tơm mbra geh mbơh ƀư ngăch ngăn. Mât đăp mpăn nău đă ƀư mpeh mông nar pă điện, mât đăp mpăn an nău pah kan jan sa n’hanh dŏng ndơ. An geh mât uănh tât rnoh nuĭh kan an tâm di ueh mhe, tâm di nău ŭch dŏng bâh ăp doanh nghiệp”.

Gay ma dơi ƀư nău ŭch ƀư tĭng nău ŭch n’hao nău dơi hun hao đah công nghiệp n’hanh ŭnh nar, n’gor Khánh Hoà ngluh mbơh ƀư âk trong kan, rgâl mhe nău kan hành chính, rhoăt gleh mông nar pă an, rgum lĕ nuĭh kan ta ntŭk rêh jêng, ntrŭt đă nău tâm kơl kan êng kan nsum tâm nău hun hao ndơ dŏng ntung trong, ŭnh nar, khoa học công nghệ n’hanh rgâl mhe rnoh mbrô, uănh khlăy ntĭm nti nuĭh kan kĩ thuật blău, dŏng KPI, n’hao nău dơi kan mbơh rblang bâh ăp ntŭk kan ngih dak, njêng nău dơh nơih gay ma doanh nghiệp ngăn ngên jêng bôk năp leo kan hun hao. Bí thư n’gor Uỷ Khánh Hoà- wa Nghiêm Xuân Thành lah na nê̆. “Gay ma n’gor Khánh Hoà hun hao 2 rnoh mbrô, n’hao nău geh tơm prăk nâp nâl rĭ mô hôm geh nău kan êng lah công nghiệp. Lah công nghiệp mô geh trong mhe, klâp lah mbra mô dơi lôch nău nchrăp kan aơ”.

Pah kan đah Ban thừờng vụ n’gor Uỷ Khánh Hoà, Kruanh Quốc hôị Trần Thanh Mẫn rnê âk nău mpŏng kan bâh n’gor an let năp tay ta trong hun hao mhe. “Nău dơi geh bâh n’gor Khánh Hoà lôch dơn ngoăy. Nĕ lah nău dơi êng, nău dơi tâm rlong, ntŭk kan n’hanh nău hun hao mhe. Ngăn lah mpeh nău wăng sa dak lêng, pâl nđaih, kơl kan ,logistics, ndrâm dak lêng, công nghiệp nkret ƀư-nkre njêng, n’hao ŭnh nar, ŭnh nar kloh, ntŭk mât rnoh mbrô. An geh uănh lĕ rngôch, n’hao ăp nău dơi, ndâk nkra ăp nău mô dơi.

         Khánh Hòa dôl lăp ta njăr trong mhe, đah công nghiệp n’hanh ŭnh nar lah 2 jrŏng kan tơm khlăy. Aơ mô dơn lah nkô̆ ŭch hun hao wăng sa, ma hôm nha lah trong kan mpơl an saơ nău dơi ta n’gor tâm rnôk lăp kan ndrel đah lam ntur neh, mpŏng tât nău dơi ta nklang nău kan công nghiệp, ŭnh nar kloh ueh n’hanh nkuăl ƀon têh ueh mhe ta năm 2030, nkre lah ntop ƀư tĭng trong kan rnă njrăng ŭnh nar ngih dak.