Ôi ntri (11/8), Đảng ủy phường Pleiku (n’gor Gia Lai) ƀư Đại hội Đại biểu lor bôk năp, năm kan 2025 - 2030. Năm kan 2025 - 2030, phường Pleiku n’gluh rnoh tât rdâk njêng Đảng bộ n’hanh lam trong kan chính trị kloh rvah, nâp dăng, droh rklaih kô̆ yơn, mbluh aih tơm ndơ hun hao, nsrôih tât rnoh hun hao 13,3%/năm, công nghiệp – rdâk njêng n’hanh rhŏ dŏng lah n’gâng tơm hun hao.

Lah rđău đă ta rnôk Đại hội, wa Nguyễn Trọng Nghĩa-Kruanh Ban Tuyên giáo n’hanh Dân vận Trung ương lah rjăp: Dăn đă ăp oh nô đăm gĭt jru ntik n’hao nău dơh geh tâm rđĭl n’hanh săk geh dŭt têh bah n’gor Gia Lai mhe n’hanh bah phường Pleiku. Ntơm bah nê rdâk tay nău nđơr rgâl mhe, nkre hun hao nâp dăng tĭng trong dăp rgum hŏ n’gluh tâm trong nchrăp, gay mhâm ƀư rdâk njêng phường Pleiku jêng phường rgum tơm, ntĭt leo leo bah n’gor Gia Lai, lah phường hun hao nđĭr uĕh, rsang rngăy n’hanh âk mpưm săk ntơr.