Nkhêp nkah ndray 50 năm Rklaih luh miền Nam, dơn ngoăy neh dak, ôi 28/4, Kruanh dak Lương Cường hŏ tât n’hơr nhang nkah gĭt Kruanh Hồ Chí Minh ta Jay 67 tâm jâng gung Nhih pah kan kruanh dak. Tâm mông nar huêng khlay, Kruanh dak hŏ n’guh mbah mpoh nhang, nkah gĭt nuĭh Kruanh rđău kan dêh rŏng bah rnoi nuĭh. Rnôk hôm nha rêh, Wa Hồ way rong an nău rŏng mha êng đah ƀon lan n’hanh tahen miền Nam way rôih dăng, mô dơi roh, di đah săk ntơ lư “Mpêr kông neh dak”.

Nkoch tât miền Nam, Wa way dŏng ăp nău dŭt dêh rŏng. Wa kuăl miền Nam lah "mham bah mham Việt Nam". Kruanh dak Lương Cường lah rjăp nău nsrôih ndrel lam Đảng, lam ƀon lan ntik n’hao suan dăng tâm rnglăp, tĭng ƀư jêng ngăn ngăn nău nđơr geh rdâk njêng neh dak hun hao têh ndrŏng. Khâl nkual têl ơm yău, Kruanh dak nkah tay nău ntĭnh rŏng bah Wa Hồ mpeh du dak Việt Nam bah tâm lơh tâm su, dơn ngoăy, geh nău tâm ban, ndrŏng dăng n’hanh lah rjăp, Nău dơi têh khay năm mhe 1975 lah nău jêng geh ngăn nău wơl nê.