Ôi 30/9, Đại hội đại biểu Đảng bộ n’gor Phú Thọ rơh bôk năp, năm kan 2025-2030, ƀư đah tât râng bah 500 đại biểu ntoh măt an rlău 257.000 đảng viên. Ntoh ngơi ntĭm rđău đại hội, Kruanh dak Lương Cường đă n’gor Phú Thọ mât nâp tâm rnglăp, tâm ban ŭch âk mpeh nău wât n’hanh nău ƀư. Rgum tay ntĭm rđău ƀĭt joet ƀư rdâk njêng, rgâl đă Đảng n’hanh trong chính trị ngăn ngên kloh uĕh, nâp dăng mpeh chính trị, nău mĭn, rdâk ƀư, nău mĭn n’hanh cán bộ.

Kruanh dak nsing nơm an lah, Đảng bộ, n’gâng kan ƀon lan ăp rnoi nuĭh n’hanh rmôt vũ trang n’gor Phú Thọ mbra mât uĕh nău way ơm rŏng dak, nuih n’hâm tâm rnglăp, nsrôih hao êng, mpŏng ŭch hao prêh, nsrôih ƀư dơi nău rƀŏng Nghị quyết Đại hội đại biểu Đảng bộ n’gor rơh bôk năp, ndâk njêng Phú Thọ nar lơ ndrŏng uĕh, gĭt blău, tâm di lah Neh dak Hùng Vương linh thiêng, tu tơm bah rnoi nuĭh Việt Nam, rgop ndrel lam Đảng, lam ƀon lan, lam tahen ƀư tĭng dơi 2 nău rƀŏng têh 100 năm.