Nar ntri (27/11), ta Hà Nội, Đảng, ngih dak he khuh n’gôr ƀư Lễ nkah ndray 50 năm Quốc khánh dak Cộng hòa Dân chủ nhân dân Lào (2/12/1975-2/12/2025) n’hanh 105 năm nar deh Kruanh Kaysone Phomvihane (13/12/1920-13/12/2025). Ntơh măt kruanh rđău kan Đảng, Ngih dak n’hanh ƀon lan Việt Nam, Kruanh dak mbah rhơn n’hanh tâm pă nău rhơn mpeh ăp nău dơi khlay, geh nkô̆ hôr khlay lịch sử ma Đảng, Ngih dak n’hanh ƀon lan Lào oh nô hŏ dơi geh tâm njăr trong hun hao 50 năm aơ.

Kruanh dak nchŏng kloh tâm boh mha êng Việt Nam - Lào, Lào - Việt Nam hŏ dơi ăp kruanh têh kuâng lah Kruanh Hồ Chí Minh, Kruanh Kaysone Phomvihane n’hanh Kruanh Souphanouvong ntăm jâng ntơm; dơi ăp rơh kơn kruanh rđău kan n’hanh ƀon lan bar dak âk mbâl rdâk njêng, mât ndray, bun dăp ma suan rhal, n’hâm suan, bôk rngok n’hanh lĕ ma nting mham, Kruanh dak lah rjăp, nê lah jêng drăp ndơ khlay mô dơi geh ndơ ntĭt ngăn, lah “nău tâm boh mô geh du dak êng ƀa ƀă dơi geh tâm lịch sử lam ntŭr neh”, lah ntŭk nsing nâp gay ăp rơh kơn nar aơ n’hanh ôi tay klak nđơn tay ăp nău nkoch uĕh mpeh tâm boh tâm rnglăp têh kuâng, mpeh tâm rnglăp mha êng n’hanh tâm rnglăp lam lĕ rngôch đah bar dak.