Ôi lơ 7/8 (tĭng mông dak nê) tâm rơh hăn khâl gưl Ngih dak tât dak Cộng hoà Angola, jêh rnôk ndơn vơt gưl Ngih dak geh ƀư tâm ntŭk kan bah Tổng thống Angola, Kruanh dak Lương Cường hŏ tâm geh rơh tâm nchră ma Tổng thống Angola Joan Manuel Goncalves Lourenco. Tâm rơh tâm nchră, Kruanh dak Lương Cường lah rjăp nau tâm boh oh nô, băl mpôl tâm dăch dơh Việt Nam-Angola lah drăp ndơ khlay nsum, lah nau dăng nâp gay bar ding pơk luh nau kan hun hao mhe, lŏ n’hao ndrel ƀư jru lơn tay nau tâm rnơm chính trị, tâm kơl đah bar Đảng, bar Ngih dak, nau tâm rnglăp, tâm dăch ndrel tâm gĭt rbăng nsum đah ƀon lan bar dak.

Kruanh dak Lương Cường đă bar ding n’hao tâm boh tâm ăp nau kan tơm kơt neh dak, rnă njrăng, ƀư ueh ndrel âk ntil nau kan tâm boh tâm nau vay ơm kơt tâm boh nŭih blau nau kan dak si, ntĭm nti, tuch tăm. Bar rđau kan tâm ban nau lŏ ƀư nâp nau tâm rnglăp, tâm dăch, tâm rnơm đah bar Đảng, bar ngih dak bah nau tâm nchră mât ăp rơh khâl ndrel lŏ tâm mâp gưl prêh, tâm ăp ntrong, ntrŭnh ƀư tam nau kan tâm boh Uỷ ban bar Chính phủ ndrel ntrŭt dăng tâm nau kan kơt kơt lah ntĭm nti nŭih kan, cán bộ mât, mbơh nchră bah sinh viên./.