Kêng măng 20/11, ta Ntŭk Kruanh dak, Kruanh dak Lương Cường wơt Kruanh Thượng viện Quốc hội Cộng hòa Czech Milos Vystrcil dôl geh rơh khâl na nê̆ Việt Nam. Ta rơh wơt, 2 ding răm rhơn mpeh ăp njoat hun hao uĕh bah tâm boh Việt Nam-Cộng hòa Czech ta âk ntil nău, ta trong nsing nơm chính trị têh.

Geh prăk tăch rgâl 2 ding hao jêng uĕh, geh 2 rmen đôlar năm 2024 n’hanh 1,9 rmen đôlar tâm 10 khay năm 2025, yơn mô hŏ tâm di đah nău geh, nsan dăng bah 2 dak. 2 ding hôm âk nău rmeh gay n’hao geh prăk tăch rgâl, ntrôl ntuh kơl n’hanh kan ndrel ta âk ntil nău êng. Kruanh dak Lương Cương đă ăp ngih pah kan lập pháp 2 dak tâm rgop tay gay geh trong pháp lý dơh an tâm boh kan ndrel ăp ding, tâm nău geh nsum bah 2 dak, rgop an đăp mpăn, kan ndrel n’hanh hun hao ta nkual n’hanh ta lam ntŭr neh.