Tâm rnôk hăn khâl ngăn tât Trung Quốc, ôi 14/10, Kruanh Quốc hội Trần Thanh Mẫn ndrel rmôt kan ntoh măt gưl prêh dak nơm lĕ hăn khâl ntŭk Nkah ơm yau Dương Gia Lĩnh ndrel ntŭk nkah ơm Tảo Viên, nkuăl ƀon têh Diên An, n’gor Thiểm Tây. Đồng chí Vương Hải Bằng, Uỷ viên Rnâng kan rđau kan N’gor uỷ Thiểm Tây, Bí thư Thành uỷ Diên An lah rjăp, rơh hăn khâl bah Kruanh Quốc hội lah rnôk nkhêp ueh gay ntrŭt dăng lơn tay nau tâm n’ur đah ăp n’gor bah Việt Nam đah nkuăl ƀon têh Diên An.

Rnê prêh ăp nau tă geh dơi bah nkuăl ƀon têh Diên An kŏ kơt lah nau nsôih bah nkuăl ƀon têh tâm nau kan mât ăp “ntŭk geh nau kan khlay”, Kruanh Quốc hội Trần Thanh Mẫn rhơn ân nkuăl ƀon têh Diên An lŏ dơi geh hun hao ndrel đă Diên An ndrel ăp n’gor bah Việt Nam n’hao lơn tay nau tâm nthoi, ntrŭt dăng lơi tay nau tâm n’ur ƀon lan, n’hao nau tâm boh nau kan pâl n’aih, ngăn lah “pâl n’aih gur” tĭng têl jâng ăp ntŭk kan cách mạng leo trong lor bah bar dak; tâm boh tâm nau mât ndrel ƀư ueh ăp nau khlay ơm, nau ơm yau ueh, ntrŭt dăng tâm n’ur ƀon lan./.