Ôi 24/2, Kruanh Quốc hội Trần Thanh Mẫn khâl n’hanh pah kan đah Ủy ban bah Quốc hội. Pah kan đah Ủy ban Văn hóa n’hanh Xã hội bah Quốc hội, Kruanh Quốc hội Trần Thanh Mẫn uănh lah prêh mpeh trong kan ndâk njêng pháp luật, tâm lĕ năm kan, Ủy ban lĕ ƀư tơm uănh năl 20 nău nchrăp ƀư Luật, 6 dự thảo Nghị quyết bah Quốc hội, 1 nău nchrăp ƀư Pháp lệnh n’hanh 6 dự thảo Nghị uyết bah Ủy ban Thường vụ Quốc hội.

Lah rjăp ndrel đah hun hao wăng sa, an dŭt n’hâm uănh tât ăp nău rêh jêng n’hanh văn hóa, tĭng Kruanh Quốc hội, aơ lah ntil naư geh tât nău rêh nuih n’hâm bah nuĭh ƀon lan. Nău rƀŏng bah Đảng he lah mât uănh lĕ nău rêh drăp ndơ n’hanh nău rêh nuih n’hâm an nuĭh ƀon lan. Văn hóa khlay an ăp nuĭh ƀon lan rêh ngăch dăng da dê, răm m’ak n’hanh kon nuĭh uĕh blău lơn. Tĭng Kruanh Quốc hội, ntil nău văn hóa, rêh jêng aƀaơ bah neh dak âk ntil nău, yơn hôm e ăp nău rlơ̆ an geh trong nkra tâm ban. Yor nê, Ủy ban an uănh nđôi, mĭn njêng n’hanh nchrăp lor geh âk dăn đă, dăn ngăch đah Đảng, Ngih dak.