Ôi 30/7, ta Geneva, Thuỵ Sỹ, nkhêp geh râng Tâm nchră IPU 6, Kruanh Quốc hội Trần Thanh Mẫn hŏ wơt Groi kruanh Quốc hội Lào Sounthone Xayachack. 

Kruanh Quốc hội rhơn rnê nău dơi geh tâm boh nar lơn ma dơi rdâk tay, lhăt jăp n’hanh geh nău dơi đah Quốc hội bar dak, lơn lah tâm nău an ƀư Nău mbơh nsum Việt Nam - Lào, Tâm ton đah bar Bộ Chính trị, Hiệp định tâm boh đah bar Chính phủ n’hanh bôk nău kan tâm boh đah bar Quốc hội, rgop ndơ̆ tâm boh mha êng Việt Nam - Lào nar lơn ma lăp tâng jru, đăp mpăn n’hanh nâp dăng. Ta rơh mâp, bar ding tâm ban ŭch ntrŭt ntrôl tay ăp nău kan geh nkô̆ khlay têh tâm năm 2025; nsrôih nchrăp an trong hăn khâl Việt Nam bah Tổng Bí thư, Kruanh dak Lào nkhêp nkah ndray 80 năm Cách mạng Khay pham n’hanh Quốc khánh 2/9; ntrôl dăng ăp nău kan tâm boh nghị viện bar ding n’hanh âk ding.